Premiera reussida

Per l’emprema ga ein vegni erui la dumengia vargada ils campiuns svizzers dad e-mountainbike. Ils campiunadis han giu liug a Mustér. Ella categoria dils umens ha il Songaglies Jürg Graf gudignau la cuorsa el territori da skis da Caischavedra. Secund ei Joris Ryf daventaus e sco tierz ei Nicolas Fischer seplazzaus. Ella categoria dallas dunnas ha Nathalie Schneitter victorisau cun pign avantatg avon Nicole Göldi ch’ei daventada dacuort campiunessa mundiala en questa disciplina ella Val di Sole. Schneitter era stada l’emprema campiunessa mundiala insumma dad e-mountainbike igl onn 2019 a Mont Saine-Anne el Canada. La medaglia da bronz ei ida la dumengia vargada a Mustér a Kathrin Stirnemann. Biebein 30 ciclistas e ciclists ein stai la dumengia alla partenza. Plievgia e per part dracca duront igl entir temps dalla cuorsa ha procurau per cundiziuns plitost difficilas. Pervia dallas schliatas cundiziuns dall’aura han ils organisaturs desistiu d’ina cuorsa da qualificaziun.  Mustér seporscha d’organisar era l’auter onn il campiunadi svizzer dad e-mountainbike.