Pro Lucmagn: Pass ei staus serraus 50 dis igl unviern

Pervia dalla biara neiv e vent ei il Pass Lucmagn staus serraus igl unviern vargau 50 dis. Quei ei 22 dis dapli ch’igl onn avon ed era per dabia sur la media da 37 dis. Sco quei che la Pro Lucmagn scriva el rapport annual ch’ei gest cumparius en vesta alla radunonza generala dils 7 d’october 2021, han ils responsabels fatg tut il pusseivel per tener aviert la via aschi savens sco pusseivel. 49 lavinas – 30 dalla vart dil nord e 19 dalla vart dil sid – ein vegnidas entochen en via, biaras autras entochen pauc sur via. Quei seigi in bien ton dapli ch’ils dus unviarns avon. Ina ga dapli ha ei dau negins accidents duront igl unviern silla via dil pass.

Dapli lavur – pli aults cuosts Ils cuosts pil menaschi d’unviern silla via denter Fuorns e Campra importan 750’000 francs. Quei ei bunamein 100’000 francs sur la media dils 21 onns dapi ch’il pass vegn aviarts era igl unviern. Tonaton ein ils cuosts sut il preventiv. Sco quei ch’il president Martin Candinas scriva el rapport annual, ei la liquiditad dalla Pro Lucmagn garantida da tut temps. Il survetsch d’unviern al Lucmagn ei vegnius procuraus igl unviern vargau l’emprema ga dalla cuminonza da lavur Edelweiss. Sias maschinas ein stadas igl unviern vargau 1272 uras en funcziun, igl onn avon era ei stau 796 uras. Quei grond diember d’uras attribuescha la cumissiun tecnica alla biara neiv, emprovas da rumir auter la via sco era il temps d’introducziun dall’equipa operativa nova. Pervia dalla pandemia dil coronavirus ha igl arranschament pil giubileum da 20 onns dapi l’avertura d’unviern digl unviern stuiu vegnir spustaus. Era uonn ei la situaziun restada malguessa, aschia ch’igl ei previu d’organisar in act da giubileum igl onn vegnent sil hospezi dil Lucmagn.