Victoria per Trun/Rabius, terradas per Schluein Glion e Lumnezia

Terrada per Schluein Glion el Cup svizzer

En in giug senza gronda tensiun spiarda Schluein Glion encunter Herisau cun 0:3 senza haver egl entir giug ina concreta caschun da sittar in gol. Mo era igl adversari ha buca giu biaras caschuns, ils gols ha Herisau sittau plitost ord il nuot. Igl emprem cuort avon pausa cun in siet da varga miez il plaz sur il goli ora. Exact aschia ha Cristian Tolino era sittau avon quater jamnas in gol a Crap Gries egl emprem giug da campiunadi da questa stagiun. Il secund gol ei curdaus ella 51avla minuta suenter in pass liung traversal da biebein 60 m sin Joel Kurzbauer, il qual ei mitschaus el dies da siu adversari e ha battiu il goli da Schluein Glion cun in siet el cantun bass. Il tierz gol la finala ei curdaus cuort avon la fin sin ina flanca dalla vart seniastra, la quala Marco Schmid ha deviau el cantun dretg. Era cheu ha il defensur schau ualti biaras libertads agl attaccader. Pli bia dat ei buca da rapportar da quei giug, sil scret da notizias dil rapportader ei sper quels treis fatgs mo aunc nudau che Murat Leblebici haigi retschiert ella 66avla minuta ina carta melna pervia d’in foul.

Beat Dermont

Cup svizzer

Schluein Glion – Herisau  0:3 (0:1)

Crap Gries. – 105 aspectaturs. – Arbiter: Lekaj.

Gols: 41. Tolino 0:1, 51. Kurzbauer 0:2, 80. Schmid 0:3.

Schluein Glion: Casutt; Frias (88. Mate Lekishvili), Andri Sgier, Gian Sgier; Leblebici, Michel, Livio Derungs, Bundi (46. Stabile), Gomes Machado; Vinzens (59. D’Atria), Dimitri Lekishvili (59. Tschalèr).

Herisau: Rosenfelder; Kurzbauer (71. Huber), Gavrilovic, Dautaj (67. Machado Ramalho), Gomes (67. Schmid); Thönig, Tolino, Bischof, Susic; Müller (67. Yildirim), Ehrbar (78. Loprete).

Remarcas: Cartas melnas:  66. Leblebici (foul).  – Schluein Glion senza Büchler, Gianluca Casutt,  Egger, Mathias Derungs, Gallmann (blessai) e Capaul (absents). – Corners: 4:8.

Trun/Rabius volva la partida dil Cup svizzer

La partida dil Cup svizzer entscheiva ideal per l’equipa da casa. Gia suenter tschun minutas va Trun/Rabius en avantatg entras Damian Schmed suenter in corner. Mo quei eis ei lu e stau per l’equipa dalla Cadi, silsuenter surpren Altstätten pli e pli la bitgetta dil giug. Mergim Osmani para da sesentir bein quei di a Pustget e marca avon pausa in schuber hattrick per l’equipa dil cantun S. Gagl. Aschia ch’il resultat munta suenter 45 minutas 1:3 per Altstätten. Il CB T/R reagescha cun Gianin Derungs e Clau Berther ed ina midada da sistem. Quei porta beinspert fretg e Gianin Derungs marca a moda a maniera sco mo el sa far ei il secund gol per l’equipa da casa. Trun/Rabius ei uss anavos el giug e muossa ina tut autra prestaziun ch’avon pausa. Quei meina ella 65. minuta tiel 3:3 entras Patrizio Decurtins. E sis minutas avon la fin vegn ei aunc meglier. Gianin Derungs vegn lantschaus cun in bi pass e setta il CB T/R en avantatg. Malgrad che Trun/Rabius sto ellas davosa minutas aunc midar il goli vegn Altstätten buc pli da reagar, aschia che Trun/Rabius ei ina runda vinavon el Cup svizzer. Facit dil giug: Avon pausa ina miserabla prestaziun e suenter pausa ina grondiusa. Pls aspectaturs segir fetg interessant, pils trenaders perencunter da piarder gnarva. (cdm/fmr) 

Cup svizzer, 1/16-final

Trun/Rabius – Altstätten 4:3 (1:3)

Pustget, Trun – 120 aspectaturs.

Gols: 5. Damian Schmed 1:0, 10. Mergim Osmani 1:1, 36. Mergim Osmani 1:2, 39. Mergim Osmani 1:3, 49. Gianin Derungs 2:3, 65. Patrizio Decurtins 3:3, 84. Gianin Derungs 4:3.

Trun/Rabius: Mauricio Cathomas (79. Robin Monn); Damian Schmed, Livio Janka, Ramon Orlik, Sandro Orlik; Mathias Flepp, Denis Monn; Mirco Pfister (46. Clau Berther), Silvan Muoth (46. Gianin Derungs), Orlando Monn; Patrizio Decurtins.

Altstätten: Drilon Demiri; Loris Liiro Peluso, Baris Civez, Simon Eugster, Noah Zünd; Neil Eugster, Manuel Stüdli, Kevin Steiger, Maurin Brülisauer; Mergim Osmani, Sahin Irisme.

Remarcas: Trun/Rabius senza Remo Alig, Beat Cadruvi, Daniel Pfister e Salvatore Stagliano. Corners: Trun/Rabius 4, Altstätten 6.

Lumnezia perda encunter Tusaun/Cazas

L’equipa dil CB Lumnezia ha l’intenziun da dar pli offensiv naven dall’entschatta che els giugs entochen ussa. Suenter che l’equipa da Tusan/Cazas metta sut squetsch ils Lumnezians ellas empremas minutas funcziunau quei lu era dètg bein. Ella 14. min. vegn in giugadur dils hosps da scappar dall’ala giu e da dar in ferm pass bass davon il gol lumnezian. Pascal Derungs emprova da spindrar, denton senza success e la culla va egl agen gol. Diesch minutas avon pausa vegnan ils indigens tier in pèr bunas schanzas, denton senza reussir. Ella davosa minuta avon pausa vegnan ils da Tusaun/Cazas da dar in bal naven dalla vart el dies dalla defensiun lumneziana. Lez vegnan buca d’intervegnir e Tusaun/Cazas marca il secund gol. Aschia survegn Lumnezia puspei in gol cuort avon pausa sco gia encunter Weesen. Suenter pausa batta l’equipa da casa vinavon e ha era dapli il bal ch’igl adversari. Il problem ei il mument da vegnir tier propi bunas occasiuns e da far gols. Ella 55. min. survegn Paul Alig sia quarta carta melna da questa sesiun, aschia ch’el ei serraus il proxim giug encunter Glaruna. Legreivel ord vesta lumneziana ei che Gion Ursin Alig tuorna ell’equipa. Damai che Remigi Collenberg croda ora pli ditg pervia d’ina blessura vegn il cader denton buca pli gronds.

Pascal Derungs

3. ligia, gruppa 1

Lumnezia – Tusaun/Cazas 0:2 (0:2)

Tavanasa, plazza da ballapei Mutteins. – 50 aspectaturs.

Gols: 14. Pascal Derungs (autogol); 45. Laurin Lanicca.

Lumnezia: Fabio Casanova; Danilo Blumenthal; Matias Alig; Manuel Casanova; Mauro Cadonau; Pascal Derungs (60. Gion Ursin Alig); Paul Alig (70. Noe Capaul); Dario Capaul; Andriu Alig; Dino Blumenthal (80. Nando Blumenthal); Attila Truffer.

Tusaun/Cazas: Ramon Noll; Christof Spörri; Aaron Patt; Yanik Brot; Dario Rüedi; Diego Raho; Leandro Rüedi; Nico Bundi; Laurin Lanicca; Alberto dos Santos Maia; Gianni Schweigl.

Remarcas: Lumnezia senza Tizian Casanova, Remigi Collenberg, Filipe Bastos, Mauro Demont e Kevin Arpagaus.

Cartas melnas: Lumnezia 2, Tusaun/Cazas 1.