Nova epoca per las Fontanivas da Castrisch

«Jeu level schon dagitg calar, mo negina che leva surprender quei post», puntuescha Marianne Bertogg all’entschatta dil discuors. Il termin per far ina fotografia cun ella e sia successura ei fixaus sin in avonmiezgi da bial’aura el quatier da Termin a Castrisch. Dunnas ein per ordinari detg pretensiusas pertuccont schar far fotografias. Gl’avonmiezgi sulegliv, ils geranis sin lautget e gl’ambient ruasseivel, il verd e las autras fluras avon casa han contribuiu che tut s’accordi. Duront che Marianne Bertogg survescha il caffè declara Doris Cabalzar daco ch’ella ha seschau eleger sco nova presidenta dallas Fontanivas da Castrisch. «Dapi zacons onns erel jeu gia en suprastonza. Jeu hai giu l’impressiun ch’ei seigi ina schanza da far zatgei pil vitg, e lu era da tener activas nus dunnas da Castrisch». Ella ha surpriu la funcziun che sia antecessura ha adempliu duront 24 onns.

Babetta fageva tut persula

Marianne Bertogg ha organisau occurrenzas ch’ein a Castrisch fetg popularas, per exempel la sera da pizzas sper il pistrin giu la staziun. Mintg’auter onn la secunda sonda dil fenadur envida l’uniun da dunnas gl’entir vitg a quella sera da cumpignia. Gl’onn 1997 haveva la radunonza generala elegiu la pura sco presidenta dallas Fontanivas. Ella ha teniu ensemen las hottas cun ina suprastonza motivada da dunnas giuvnas. Sper la sera da pizzas han las dunnas da Castrisch era incumbensas socialas per tuttas generaziuns. Co ella ei vegnida ell’uniun raquenta Marianne Bertogg suandontamein: Gl’onn 1980 haveva ella maridau a Castrisch e vegnida viaden ellas structuras dil vitg. Quei medem onn hagi ella giu d’accumpignar sia sira alla radunonza dallas Fontanivas. «Ti vegnas!», ha ei tunau da gliez temps egl imperativ. Ella ei ida, ed ei restada, tochen oz. «Da gliez temps menavi Babetta Wetten l’uniun. Quella ha fatg biars onns tut persula quei post. Lu havein nus giuvnas surpriu, nus havein mess si ina suprastonza», raquenta Marianne Bertogg.

L’anteriura presidenta Babetta haveva buca saviu far persula dabia. Suenter la reorganisaziun han l’uniun dallas dunnas da Castrisch entschiet cun in program annual cun plirs accents che han aunc oz prioritad. Daferton ha Marianne Bertogg saviu dar vinavon siu post alla successura. Ella hagi plascher ch’ei mondi vinavon, conceda Marianne Bertogg. Doris Cabalzar ei vegnida a Castrisch, tuttina sco sia antecessura, tras maridaglia. La giuvna dunna da Bertschis sper Flums haveva fatg gl’emprendissadi da pura sin in menaschi a Sevgein. Cheu ella Foppa ha ella empriu d’enconuscher Daniel ch’ei daventaus siu um. La nova presidenta dallas Fontanivas puntuescha ch’ella seigi buca persula al tgamun. Cun Sabrina Christoffel, Renata Derungs, Astrid Hänny e Nina Berni s’engascha ella pils seniors dil vitg, mo era per la buna cumpignia denter las dunnas dil vitg. Doris Cabalzar ei leda ch’ellas ein en tschun en suprastonza, e buca mo en treis. «Tschun han dapli ideas che treis», motivescha ella. Surcargadas seigien ellas buca cun lavur ed activitads, aschia ch’il presidi seigi plitost in plascher ch’ina carga.

Communicaziun digitala

Pils seniors organisescha las Fontanivas la meisa da miezgi e regularmein era il suentermiezgi da giugs. Ei seigi legras sentupadas, deplorablamein sesentien ils «giuvens» seniors buca plidentai da separticipar. Ina dallas finamiras che Doris Cabalzar ha ei da gudignar aunc dapli las dunnas giuvnas sco commembras dallas Fontanivas. Avon 40 onns, cu Marianne Bertogg ei vegnida a Castrisch, eis ella stada engrazieivla che sia sira ha dau ad ella in stausch che ha gidau da s’integrar. Ils temps ein semidai, ed il secuntener dalla societad era. Las modas e metodas da communicar ein denton buca schi schliatas.

Doris Cabalzar raquenta ch’ella communicheschi savens cun Whatsup. Per la suprastonza e per tuttas commembras dall’uniun hagien ins formau la gruppa da contact digital dallas Fontanivas. Quei promovi il setener ensemen, ed ei gartegi era bein da clamar ensemen ni d’organisar ina sentupada spontana. Sper la sera da pizzas, gl’engaschi pils seniors, il far paun el pistrin ni era las seras regularas da giugs denter ellas van las commembras dall’uniun mintgaton era sin viadi. Il davos ch’ellas han fatg ei staus tochen…Glion. Giebein, a pei tochen ella capitala vischinonta. «Era sch’ins ei carschius si cheu, dat ei ella Foppa caussas interessantas da scuvierer», gi Marianne Bertogg. Ella ei carschida si a Glion, mo enconuscheva e saveva buca quei e tschei ch’il guid dil marcau Robert Werro ha declarau silla guidada.