Casas che sesaulzan

Igl onn 1974 han ins lantschau a Flem in’occurrenza nova che s’auda tier gl’atun: l’jamna internaziunala da balluns d’aria caulda. Mintgamai la davosa sonda dil settember entscheiva quella. L’aura ei in factur che influenzescha ferm las activitads sil prau da balluns a Casa d’Uaul Sut. Sonda endamaun havess ei buca saviu esser meglieras cundiziuns. Da Trin, ella Foppa tochen en Lumnezia han ins saviu observar l’emprema gada ils objects aviatics. Mintgamai la damaun allas siat ed il suentermiezgi allas 16.30 vegnan las 18 squadras sil prau da balluns e sepreparan per in viadi. En tgei direcziun ch’ei va decida il vent e l’aura. Las cundiziuns el priel denter Crap S. Gion e Crap da Flem ein specialmein Gl’avonmiezgi sesaulza il pilot cun gidonters e passagiers per in viadi pli liung. Il suentermiezgi restan els a Flem e contuorn. Sonda suentermiezgi ha la bial’aura carmalau numerusa glieud sil prau da balluns. Bia famiglias d’indigens e hosps da vacanzas, glieud dalla regiun e d’ordeifer han mirau co ils pilots ein vegni cul carr annex sil plaz. Leu han els scargau il canaster e la teila dil ballun. Pign e grond selai fascinar cu ina teila suenter l’autra vegn sufflada si e sescufla tochen varga 3000 m3. Tochen dumengia, ils 3 d’october, san ins mintgamai mirar il spitachel da partenza dallas 18 equipas. Sonda ha era il Club Fiat 500 Svizra visitau l’occurrenza a Flem. Ina colonna dils autos pigns legendars ha parcau avon il prau da balluns ed ha mirau co ils gigants ein sesalzai. (fmr/abc)