Vuorz: «Dis dil Meister» cun activitads e musica dil temps medieval

La fin d’jamna dils 2 e 3 d’october 2021 stat a Vuorz ell’enzenna dil temps medieval: Sittar cun ballester, malegiar frescos sco il Meister da Vuorz ni guder musica dil temps da pli baul. A bia glieud ei Vuorz enconuschent surtut pervia dallas interessantas picturas en sia baselgia. Quei scazi artistic propaghescha il liug cun organisar differents arranschaments mintg’onn. In da quels ei sonda e dumengia el Curtgin grond. Sco quei ch’ils organisaturs scrivan en ina communicaziun als mieds da massa porscha il bein puril da bio visavi il hotel Ucliva la culissa ideala per differentas activitads. Il program entscheiva la sonda avon miezdi denter auter cun l’Uniun per tecnicas da catscha prehistoricas ni era la pusseivladad da malegiar frescos culla restauratura Brigit Bütikofer. La sera vegn purschiu ina tscheina tenor il temps medieval e la dumengia entscheiva il di cun in survetsch divin cun ser Jan-Andrea Bernhard en accumpignament musical dalla formaziun «Mittelalter-Spiellüt». Cun activitads sco giugs e musica cuntinuescha la dumengia. Denter auter vegn era purschiu ina cuorsa cun posts per affons en accumpignament da lur geniturs. Cun quels dus dis vul il Luvratori dil Meister da Vuorz far aunc pli enconuschent l’ierta culturala dil pictur nunenconuschent che ha giu malegiau ils frescos ella baselgia. Sco ils organisaturs constateschan duei quei era succeder en fuorma d’aventura cun elements creativs e da giug. Informaziuns detagliadas ein da cattar sin www.waltensburger.ch.