An memorgia – Ernesto Vigne 1944 – 2021

Ernesto Vigne – carstgang, pastour dallas olmas e plevant – an chella successiun. Cun chels pleds ò la pastoraziun digls spitals da Turitg, noua tgi Ernesto Vigne ò luvro blers onns anfignen tar la sia pensiun, condolo alla famiglia an malancurada.

Chels pleds demossan er las qualitads dad Ernesto Vigne, tgi èn stadas chellas d’en carstgang avert pigls chitos digls paztgaints dalla psichiatria digl spital d’universitad Turitg scu er pigls sies ameis, ameias e la sia antiera famiglia.

El sez pudeva rimnar nova energeia ainten la musica, cun sunar cun mintga caschung igl orgel u clavazign. Mintgatant pudevan er igls parochians da Salouf profitar da chella passiun dad Ernesto Vigne. Ainten chella vischnanca è Ernesto Vigne carschia se ainten ena gronda famiglia cun dus mez-frars, Benedetto e Flavio, igl bab Augusto, la madregna Esther scu er l’onda Alexa ed en’antiera rotscha barbas. Malgro tg’igl bab era savens davent segls plazzals, ò igl battafi Ernesto galdia la sia unfanza ainten la vischnanca muntagnarda.

Chella unfanza ò antschet uriund igl favrer 1944 ainten la provinza veneziana Belluno. La sagonda ghera mundiala cuntinuava anc ed igl bab Augusto è nia clamo curt siva dalla naschientscha dad Ernesto alla lavour sfurzada an Pologna. Durant l’absenza digl bab è la mamma Angelina neida mazzada da partisans. Igl pitschen Ernesto è nia tar la nonna ed igl nonno. Siva la ghera ò igl bab catto lavour ed ena nova amour an Svizra. Uscheia ègl nia tgi Ernesto è sa scaso ansemen cun sies bab ainten la vischnanca grischuna Salouf. Bagnspert ò igl mattatsch Ernesto amprandia rumantsch e fatg cunaschientscha digl plevant Ser Duri Lozza. Chel ò gia ena grond’influenza per la sia veta futura.

Ernesto Vigne ò passanto, siva dallas scolas obligatoricas, igl gimnasi a Mustér e pi tard igl seminari da spirituals a Coira. Igl 1968 ò el festivo la sia messa nuvela ainten chella vischnanca tg’igl ò gia purschia ena nova patria, a Salouf.

Durant tot igls sies onns scu spiritual, surtot a Turitg, ò el banadia l’egna u l’otra lètg e battesim er aint igl Grischun. Ernesto Vigne è sto en carstgang avert da spiert e cor. Igls 9 da settember 2021 ò chel cor calo da batter siva da greva malsogna. Ma er sur la mort or ò Ernesto Vigne muanto igls sies ameis cun lascher preliger durant la messa da bara en agen text da cumgea. La messa è neida celebrada digl sies anteriour collega ainten la pastoraziun clinica, igl uestg Josef Maria Bonnemain.