«Bargir san ins buc adina»

«He schiri, na, buc ina carta melna.» In tec hectica ha ei tuttina dau la sonda vargada silla plazza da ballapei a Degen el giug dils juniors C denter il Team Surselva e l’equipa dil Club da ballapei da Domat. La squadra da Domat ha fatg pulit pressiun ella secunda mesadad e marcau in gol suenter l’auter. El cumbat da defensiun ha ei dau in foul ed igl arbiter Amir Mohebbi ha tarmess ina giugadura sursilvana sil baun.

Il dudischavel um dalla US Rueun

Igl arbiter Amir Mohebbi deriva digl Iran, ei vegnius avon biabein tschun onns en Svizra sco fugitiv ed ha schulau la sonda vargada a Degen siu secund giug. «Gie, jeu sun fetg cuntents, schegie che jeu sun aunc vid em­prender.» Senza arbiter negin giug, quella devisa ei bunamein daventada realitad tier l’Uniun sportiva Rueun. Dus onns alla liunga ha il club da ballapei encuriu ina arbitra ni in arbiter. Aurelio Valaulta, responsabels tier la US Rueun per igl arbiter, ha getg ch’ei seigi stau stentus d’encurir soluziuns per saver separticipar al campiunadi. «Mintga club sto metter a disposiziun in arbiter.» Suenter dus onns senza arbiter fuss l’equipa dalla US ­Rueun stada sclausa dil campiunadi dalla 5avla ligia. «Mo lu ei Amir Mohebbi sepur­schius, entuorn siat cantuns», ha Aurelio Valaulta getg. Ch’els seigien vegnius en contact «via facebook». Amir Mohebbi ha getg cun in surir, d’haver enderschiu che la US Rueun enqueri in arbiter. Da sia equipa da casa enconuscha el sulet Aurelio Valaulta. «Gie segir, jeu less emprender d’enconuscher l’equipa dalla US Rueun.» Auto posseda il fugitiv che viva a Cuera buc. El contonscha las plazzas da giug cun il traffic public.

Bandunau la patria

Paregliar igl Iran cun la Svizra ni il cantun Grischun sappi ins en negins graus, ha igl arbiter cun status d’asil getg. «Era buca pertuccond il ballapei.» Amir Mohebbi ha dau ballapei en sia patria el marcu da Shiraz, ina capitala regiunala el sid digl Iran cun 1,5 milliuns habitonts. «Jeu erel defensur.» E co ei Amir Mohebbi ve­gnius a strada sco giugadur cun igl arbiter? «Jeu hai reclamau stedi.» Cun 18 onns ha Amir bandunau sia patria che porscha paucas perspectivas a glieud giuvna. Ses confamigliars ha el viu la davosa ga avon sis onns. «Via whatsapp vai jeu contact cun mia famiglia.» Secapescha ch’ils confamigliars mauncan. «Ils emprems dus onns egl jester ein dirs.» Amir Mohebbi ha getg dad esser s’integraus fetg bein en Svizra. «Ti sas buca bargir adina». El ei dil meini ch’il carstgaun sappi s’adattar. Amir Mohebbi ha empriu tudestg, el capescha schizun il dialect svizzer, lavura ed ei da buna speronza da saver restar en Svizra. Sche buc, stat el avon in avegnir incert, e probablamein era la US Rueun. Igl Uffeci federal da migraziun ha aunc buca decidiu, sche Amir Mohebbi sa star definitiv.

Arbiters ein tschercai

Persequitau il giug, respectiv la lavur digl arbiter a Degen la sonda vargada ha Erich Furter, sez arbiter e responsabels per ils arbiters en­teifer igl OFV. «Gie, jeu sun fetg cuntents cun igl engaschi e la lavur dad Amir Mohebbi, secapescha e normal ch’el fa aunc sbagls.» Tgirau in arbiter cun status d’asil ha Erich Furter aunc mai. Quei ei per el diltuttafatg secundar. «Jeu sun leds da mintga persuna ch’ei promta da star a disposiziun.» Problems da recrutar arbitras ni arbiters han tut ils clubs. Bunamein fuss igl engaschi da Amir Mohebbi ius dall’aua giu. Igl OFV scolescha ses arbiters el Principadi da Liechtenstein. In fugitiv cun status d’asil en Svizra astga buca ir sur cunfin. Amir Mohebbi ha saviu far sia scolaziun el cantun Turitg. Ed il foul ch’igl arbiter oriunds digl Iran ha schulau la sonda vargada a Degen? «Jeu vai gia giu admoniu la giugadura ina ga, aschia che jeu sun staus sfurzaus tiel secund foul da tarmetter ella sil baun.»