Vandia cartas da staschung per diesch milliuns

Alla 16avla radunanza generala da Lai Pendicularas SA èn stos preschaints 235 acziunaris, an cumparaziun cun oters onns en pitschen domber. La societad ò 3700 acziunaris e tigls acziunaris principals totgan igl cumegn da Vaz cun 35%, la Priora Suisse cun 26% ed igl cumegn da vaschigns da Vaz cun 13%. La raschung tgi igl interess per la radunanza generala è betg sto schi grond è bagn er tgi sainza certificat da covid è betg sto pussebel da sa participar alla radunanza generala.

Ena societad d’aventuras

Aint igl sies pled introductiv ò Felix Frei, igl president digl cunsegl d’administraziun da Lai Pendicularas SA detg tgi igl basigns digl taimp liber sa meida permanentamaintg. Oz tschertga igl giast ples aventuras ed ena purscheida cumpletta, cun esser la nossa societad ena societad d’aventuras. La destinaziun da vacanzas da Lai seia oz s’avanzada digl catscheder tigl catschea. Igls davos diesch onns vegia Lai Pendicularas SA investo 150 milliuns francs e Lai totga oz betg per ­navot tar egn digls pi ancunaschaints territoris da skis. Igls proxims onns investescha la societad acziunara angal ainten renovaziuns e sanaziuns d’implants existents, ò detg Felix Frei. Chegl tgi pertotga igl hotel a Fadail lò ins seia en zap anavant cun esser la dumonda da far ena midada dalla zona, tigl cantun. Igl davos pled vegia sa tgapescha igl suveran da Vaz per far la midada da zona. 

Marcus Lenz è sa retratg

Siva d’esser sto otg onns commember digl cunsegl d’administraziun è Marcus Lenz sa retratg da chel mandat. An chels otg onns ò el represchento igl cumegn burghes da Vaz an chel gremi. Da nov appartigna Philipp Sauber, en impressari turitges e spezialist schi vo per digitalisaziun, energeia e finanzas, agl ­cunsegl d’administraziun. Igls acziunaris on decidia da betg redutgier igl domber dallas persungas tgi fon part agl cunsegl d’administraziun e lascher chellas tar 11. Aron Moser, igl mastral da Vaz e Sascha Ginesta, igl suprastant tgi appartignan er a chel gremi sortan cun la fegn da chest onn digl cunsegl d’administraziun da Lai Pendicularas SA cun betg ple esser commembers dall’executiva digl cumegn da Vaz. Da supponer è tgi successour d’Aron Moser davainta Maurin Malär, igl nov mastral da Vaz e scu sagond represchentant digl cumegn da Vaz egn digls quatter suprastants.

Da chintar cun da tots scenaris

Thomas Küng, igl schef executiv operativ da Lai Pendicularas SA è plagn optimissem chegl tgi pertotga la staschung d’anviern 2021/22. Aglmanc la vendita da cartas da staschung per Lai ed Arosa seia en veir boom. Anfignen ossa seian neidas cumpradas cartas da staschung per ena somma da 10 milliuns francs, tantas scu anc mai. Chegl tgi pertotga igl travagl sez ins vegia da chintar perveia dalla pandemia cun ples scenaris cun esser igl mument anc bler intschert tge tgi igl cunsegl federal decida an vista agl avigneir. Tgunsch pussebel tgi succeda tgi sainza certificat da covid seia betg pussebel d’eir cun skis, dei Thomas Küng. Er cun chella realitad seia da chintar ed er acceptar schi seia schi gliunsch. An tots cass seia d’esser fitg flexibel ed esser pront mintga de per novas ordinaziuns e maseiras davart da Berna e digl cantun.

Cugl auto an pe cugl med public

Felix Frei ò fatg varsaquantas agiuntas tigl rendachint 2020/21. Igl president digl ­cunsegl administrativ ò detg tgi seia sa musso tgi igl davos onn seia betg nia fatg tant adiever digl bus da sport e digls meds da traffic publics. Chegl sa mossa tar la somma totala dallas taxas per parcar. Chella è cun antradas da 689 000 francs per 167 ​000 francs pi ota tgi anc igl onn avant. Persiva è igl tschains dalla gastronomia sa redutgia per 367 ​000 francs sen en total dad 802 ​000 francs.Per reclama ò Lai Pendicularas SA casso igl davos onn da gestiun 852 ​000 francs. Las 11 persungas tgi appartignan agl cunsegl d’administraziun èn neidas indemnisadas cun en total da 176 ​000 francs. Alla fegn dalla radunanza generala èn er nias onoros igl anteriour directour Peter Engler ed igl anteriour president digl cunsegl d’administraziun Christoph Suenderhauf.

Bildlegende