La Chasa Polivalenta a Valchava dà da discuorrer
Cunter la decisiun da la suprastanza dal Cumün da Val Müstair da vender sia immobiglia, la Chasa Polivalenta a Valchava, han 170 abitantas ed abitants lantschà ün referendum. Els lessan evitar cha’ls abitants da la chasa tilla stopchan bandunar.
«Causa la situaziun finanziala plü difficila sto il Cumün da Val Müstair vender üna part da sias immobiglias cumünalas», ha declerà d’incuort la presidenta cumünala Gabriella Binkert Becchetti a la FMR. Daspö il principi da quist on piglia üna cumischiun suot ögl las abitaziuns e chasas in Val Müstair chi sun proprietà dal cumün. Üna da quellas immobiglias es la Chasa Polivalenta a Valchava.
«Cul dret da precumpra»
In mai ha il cumün orientà a las abitantas Agatha Bass-Bott e Sonja Gross ed a Damian Lechthaler ch’el tschercha da vender las abitaziuns singulas o la chasa intera. «A las fittadinas e’l fittadin vaina dat il dret da precumpra», ha infuormà la presidenta cumünala, «ad els chi sun indigens vendessna las abitaziuns per ün predsch fich favuraivel.» Schi nu fessan adöver da quista sporta füss tenor Gabriela Binkert «la megldra alternativa sch’inchün cumpress tuot la chasa e dess inavant a fit las singulas abitaziuns». Cunter quista decisiun da la suprastanza cumünala es gnü lantschà in lügl ün referendum suottascrit da 170 abitantas ed abitants: «Cun quist referendum pretendan convaschinas e convaschins da nos cumün cha quel reponderescha quista decisiun e tilla suottametta a la radunanza cumünala.» Ün chi s’ingascha per tgnair la Chasa Polivalenta in proprietà cumünala es Gervas Rodigari.
«Evitar ch’indigens stopchan bandunar la Val»
«In quella chasa abitan duos guaivdas attempadas, 70 plus», disch l’ultim president cumünal da Valchava, «tuottas duos vaivan svessa üna chasa ed han surdat quellas als giuvens.» Ch’ellas nu varan la pussibiltà da cumprar las abitaziuns, suppuona Gervas Rodigari. «E quant ‘liquid’ cha Damian Lechthaler es per pudair cumprar l’abitaziun nu saja.» Cha’l privel saja grond ch’el e sia partenaria bandunan Valchava, forsa eir la regiun, constata’l, «meis motiv per m’ingaschar in chosa es ch’eu sun da l’avis cha’l cumün stess verer da tegner las abitaziuns cumünalas per tillas dar a fit ad indigens.» L’anteriur capo da Valchava es da l’avis cha’l cumün pudess il prüm vender oters da seis abitaculs e na güst sia Chasa Polivalenta abitada dad indigens. Ün oter abitant chi’s fa pissers per quista chasa a Valchava es Flurin Bott.
«Spranza reponderescha il cumün sia intenziun»
Sco ch’el disch nun es la sporta dal cumün da vender las abitaziuns per predschs fich favuraivels mai gnüda discussa culs abitants. «E che significha, fich favuraivel?», as dumonda Flurin Bott chi’d es il frar d’üna da las abitantas, «schi va tenor la valur da trafic da la chasa nu’s pudaran ils abitants indigens as prestar da cumprar las abitaziuns.» In quai chi reguarda l’età es la Chasa Polivalenta la plü nouva chasa cha’l cumün posseda: «Ella es gnüda fabrichada i’ls ons 1994/95, il bsögn da tilla renovar nun es uschea amo grond», constata’l, perquai as dumonda’l perche cha’l cumün nu venda il prüm oters da seis abitaculs. «E sch’inchün cumpress, sco cha nossa presidenta ha dit, güsta tuot la Chasa Polivalenta nu füssa amo lönch na sgür cha’l nouv proprietari dess inavant a fit la chasa», agiundscha Flurin Bott, «forsa dovress el i’l plü mal cas la chasa eir sco seguonda abitaziun, quel privel exista.» Perquai speran el e Gervas Rodigari cha’l cumün reponderescha la vendita da la Chasa Polivalenta a Valchava. Flurin Bott e Gervas Rodigari as chattan prosmamaing cun Gabriella Binkert per discuter l’avegnir da quista chasa e tscherchar üna soluziun.
Gust da leger dapli?