Münchener Freiheit vegn a Sedrun

La «febra da schlaghers» ei sederasada a Sedrun cu l’Uniun events Tgina dil Rein ha envidau il settember 2019 all’emprema ediziun da «Schlagerfieber Sedrun-Disentis».  Previdas fuvan ulteriuras ediziuns il 2020 ed era quest atun, mo ­muort la pandemia da corona han quellas stuiu vegnir spustadas. Ils bigliets gia acquistai valan per l’auter onn.

«Ohne dich…»

A caschun da sia davosa sentupada ha il comite d’organisaziun – cun Silvio Schmid alla testa – decidiu, che «Schlagerfieber Sedrun-Disentis» duei haver ­liug l’auter onn e quei sonda, ils 10 da settember 2022. Tenor in communicau als mieds da massa entscheiva la fiasta da schlaghers gia la sera avon. Venderdis, ils 9 da settember 2022 ha liug ella halla plurivalenta Dulezi a Sedrun ina parti per sescaldar e quei cun DJ Quirino. La sonda infectescha la «febra da schlaghers» vinavon ed era lu han ils concerts liug ella halla plurivalenta Dulezi. Ils stars dalla sera ein senza dubi ils cantadurs dall’enconuschenta gruppa Münchner Freiheit. Tgi enconuscha buca lur hits sco «Ohne dich (schlaf ich heut Nacht nicht ein)» ni  «Tausendmal du»?

«Zipfelbuben»

Silla tribuna a Sedrun sepresenta plinavon era la cantadura Sonia Liebing, il schootingstar dil schlagher tudestg. Ulteriurs acts ein il star da schlagher ord la Svezia, Julia Lindholm ed il duo svizzer Stixi & Sonja. Duas bands ch’ein medemamein dalla partida e han gia procurau avon dus onns per in’atmosfera tut speciala ein ils «Zipfelbuben» dalla Tiaratudestga ed ils «Jungfidelen» da Kärnten/Austria. La moderaziun dalla sera surpren era l’auter onn igl entertainer DJ Tom-s.