Furmiclas el marcau

Igl ei in migeivel di d’atun. Jeu stun sin in grond plaz e contempleschel ils ba­ghetgs che creschan el tschiel. Gl’entir marcau ei plein veta e moviment. La vusch d’in cantadur vegn accumpignada dalla berglada d’ina gruppa da demon­strants. El proxim cantun emprova in artist da perschuader in pèr da seschar malegiar. La fin finala capituleschan els e sesan sin duas sutgas da camping plitost instabilas.

Adina puspei van persunas en mondura cun egliada surtratga en prescha sur las vias. Quels individis cun lur tschecca cumparsa van bein a prau cun las casas alvas flegiadas en in stil classic, denton era cun ils edifecis moderns ord veider. Malgrad ils stils cumpletamein cuntraris ei il maletg dil marcau fetg harmonics. Semegliont eis ei cun ils carstgauns che vivan cheu. Giuvens e vegls, rehs e paupers, in coexista sper tschel.

Mes patratgs e mias ponderaziuns vegnan vonzei interruttas d’in um che tegn in cedel tgietschen sut miu nas. Igl ei ina reclama per bus dubels, ei dat bi­gliets per 24 ni 48 uras. Jeu stoss rir. Mia tatta ha raquintau da quels vehichels fascinonts e co ch’ella capeva buca tgei ch’ei manegiavan cura ch’ei schevan «on top». Quei ha stuiu esser grev dad esser cun 18 onns persula en aschi in grond marcau senza saver il lungatg. Ozildi eis ei standard d’emprender quei lungatg en scola, perquei gartegi beinmaneivel da sedefender e declarar ch’jeu less buca cumprar in bigliet. Jeu sun leda ch’jeu sun habla da communicar cun la glieud e medemamein impressiunada ch’ella ha manischau quei resch persula.

Dapi che mia tatta ei stada cheu ei probablamein aunc bia auter semidau. Tuttina, stond en il medem liug sco ella avon varga 63 onns, ei tut, las casas, las glischs che sclareschan la notg, ils cars­tgauns che semovan sco furmiclas tras las vias, aunc adina talmein surprendent sco quei ch’ei ha stuiu esser per ella.