Per trar a nüz ils potenzials da trais territoris

Da l’on 2019 es gnü lantschà il proget «Ulteriur svilup dal PNS, dal Parc natüral Biosfera Val Müstair e da l’Unesco reservat biosferic Engiadina Val Müstair». Da prümavaira 2022 s’occuparan las suprastanzas dals trais cumüns invouts lasupra.

FLURIN ANDRY/FMR, ils 6 d’october 2021

Co as poja cuntinuar a sviluppar il Parc natüral Biosfera Val Müstair, il reservat biosferic Engiadina Val Müstair cul label da l’Unesco e’l Parc Naziunal Svizzer (PNS) per pudair trar a nüz optimalmaing lur potenzials pella regiun? «Cun quist böt ha la Regiun Engiadina Bassa Val Müstair (EBVM) lantschà dal 2019 ün proget», declera Philipp Gunzinger. El presidiescha il Forum EBVM e maina il comitè directiv da quist proget. «Ragiundscher il böt as voula eir cun ingrondir il perimeter sün tuot il territori da Scuol e da Valsot.»

Actualmaing amo illa fasa d’examinaziun

Sco prüm ha il comitè directiv laschà far ün stüdi da fattibiltà dal proget regiunal. «Davo quel stüdi vaina examinà a fuond ils detagls da quist model, uossa laina entrar in discussiun cun tuot ils partenaris relevants per nos proget», infuorma Philipp Gunzinger. Quai sun, sco ch’el disch, partenaris da chatscha e pes-cha, d’agricultura, d’economia e mansteranza e dal turissem. «No ramassain ils inputs da quellas organisaziuns e cumpilain ün rapport chi cuntgnarà sper ils resultats da las discussiuns culs partenaris eir las nossas analisas detagliadas.» Quist rapport servirà als trais cumüns Scuol, Valsot e Cumün da Val Müstair ed a la Cumischiun federala dal Parc Naziunal sco basa per decider: «I decidaran schi vöglian proseguir cul proget o na.»

Porta averta eir per ulteriurs cumüns

Quista decisiun traran las suprastanzas cumünalas da prümavaira 2022. «Sch’ellas dischan, schi, no vezzain qua ün potenzial, uossa lessna sortir da la fasa d’examinaziun ed entrar illa fasa da planisaziun concreta co realisar il proget», explichescha il president dal Forum EBVM. Scha quai es il cas esa previs, «l’ultim pled in chapitel ha il suveran», chi detta las votumaziuns a l’urna a la fin da l’on 2023. Ils cumüns Samignun, Zernez, S-chanf, Zuoz, Madulain e La Punt Chamues-ch han il status d’observatuors», conclüda Philipp Gunzinger, «els vegnan regularmaing infuormats davat il stadi dal proget. Per quels cumüns esa pussibel da’s partecipar eir plü tard al proget, quella porta es averta.»

Ils trais partenaris
Dal proget regiunal in chosa fan part trais partenaris: Il Parc Naziunal Svizzer (PNS) es gnü fundà da l’on 1914 e cumpiglia parts dals territoris cumünals da S-chanf, Zernez, Scuol e la Val Müstair. Il Parc natüral Biosfera Val Müstair es gnü fundà dal 2011. L’UNESCO reservat biosferic Engiadina Val Müstair ha survgni il label da l’Unesco da l’on 2017. Quel territori cumpiglia la zona centrala dal PNS, il parc natüral Biosfera Val Müstair e parts dal cumün da Scuol. Tant il parc natüral sco eir ils territoris dal cumün da Scuol sun zona da chüra e svilup: Ün svilup es qua permiss, el sto però esser perdürabel.