«Spitachel ella Scala»

La classa 5G dil gimnasi claustral da Mustér sefatschenta in’jamna cun art e musica cun focus special sigl agir ella musica, performance, sculptura ed installaziun – e quei ella «Scala Trun». Igl ei il liug da musica ed art a Trun iniziau digl artist Gianin Conrad e la sopranista Quirina Lechmann ch’ein omisdus scolasts al gimnasi. Venderdis, ils 8 d’october naven dallas 15.30 finescha il project cun ina vernissascha per geniturs ed interessai.

parter

In’jamna extraordinaria spetga ils scolars gimnasials: Enstagl dad ir a scola passentan els quest’jamna cun art e musica. Damai ch’igl ei la davosa jamna avon las vacanzas d’atun, eis ei ina super pusseivladad dad esser ella classa, mo far tut enzatgei auter che schiglioc en scola. Cun esser ella «Scala Trun» dat ei quella midada aunc pli fetg. Jeu enconuscheval gia la «Scala». Entschatta matg sun jeu staus all’avertura, hai mirau l’exposiziun, tedlau l’opera da mia scolasta d’engles e viu tgei che miu scolast da dessegn fa atgnamein. Uss ei la «Scala» per mei denton semidada en in liug creativ. Ei ha aschi bia differentas caussas el baghetg ed aschi bia differentas persunas fan differentas caussas – biaras da quellas artistic – ed jeu sun cuntents dad esser part da quella creativitad.

Luvrar a moda creativa

Gia igl emprem di procura per damondas pertuccont il pensum artistic. En stanza sesanflan sper entginas aissas da lenn surtut immensas talgias cartun – il material che stat a disposiziun als scolars e las scolaras per furmar zatgei creativ, per baghegiar e construir. Las lavurs resultontas duessen vegnir messas en stanza, duvradas sco instruments ni inscenadas sco performance. Giavischau ei in experiment denter plastica/sculptura e musica, performance ed installaziun. Spitgau han ils scolars differentas caussas: Entgins selegravan sin saver esser creativs, auters sin far musica ensemen e puspei auters sin saver baghegiar e zambergiar. Jeu sun selegraus sin saver far bia mez.

Suenter in’introducziun ella fabrica da ponn e saver entscheiver a luvrar en gruppas, havein jeu e miu cumpogn entschiet cun nossa rolla «speciala» – nus essan sper astgar baghegiar surtut responsabels per las medias: Scriver artechels, far il flyer, envidar il publicum, far reclama, esser leu per la pressa e far intervistas culs conscolars. Spert havein anflau ora ch’entgins havevan aunc mauns vits, auters gia il fundament. L’idea pareva ad esser cheu, mo co pomai realisar la pulenta?

Interpretar musica egl art

Suenter il plan spitgavan nus da saver luvrar tochen miezdi e lu far musica sco tuts enconuschan: Cantar ensemen en in rudi – sco el chor. Leu erel denton surstaus: Nus vein fatg tut enzagei auter. Cun agid dalla «Stripsody» da Cathy Berberian havevan nus dad esser creativs aunc inagada ed interpretar ils maletgs dalla «partitura» sin nossa moda e maniera. Gia suenter 20 minutas han tuttas gruppas astgau performar lur «product» e nus havein perfin dumignau ils scolasts da far ina performance.

Uss selegrein nus silla vernissascha dalla fin, nua che nus savein mussar a nos geniturs tgei ch’ins sa era far en scola: Esser creativs, far experiments e buca mo emprender, emprender, emprender.

Project cumbinaus cun lavur da medias

El rom da quest’jamna da project dalla classa 5G dil gimnasi claustral da Mustér a Trun sefatschenta ina gruppa era dalla lavur da medias. Realisar in project ei ina caussa – far enconuschents el l’autra. Per quei motiv dat la FMR en quei liug spazi alla presentaziun dalla lavur dallas studentas e dils students.