Grep instabil sto vegnir siglientaus
Rodund 150 m sur las gallarias Steintöbeli dalla via da Val S. Pieder dat ei pli grondas massas da grep instabilas. Cun ina siglientada controllada disfa igl Uffeci da construcziun bassa quella massa da grep ch’ei periclitada da curdar a val. Aschia impedescha el ch’il grep pudess donnegiar las gallarias.
Igl Uffeci da construcziun bassa ha gia renovau ils davos onns pliras construcziuns artificialas e gallarias per liung dalla via da Val S. Pieder. Cul project current duein igl onn proxim, il 2022, vegnir sanadas e rinforzadas las duas gallarias Steintöbeli 1 e 2. Quellas sesanflan paucs kilometers avon Val S. Pieder, respectivamein al cunfin nord dalla cava da crappa Schmitteli.
Concept da mesiras
Duront las lavurs da rumir greppa e da segirtad la stad 2021 eis ei vegniu constatau – ultra dallas instabilitads dalla greppa da pintga dimensiun ch’eran gia enconuschentas – era in pli grond clutger da grep e plinavon, gest sur quel, pachets da greppa libers. Las massas da grep sasanflan en ina sdrema da grep ch’ei buca vesibla naven dalla via, rodund 150 m sur la via cantunala. Las examinaziuns geologicas e geotecnicas ch’ein vegnidas fatgas han mussau ch’igl ei da quintar proximamein cun ina curdada parziala ni totala dil grep. En quei connex eis ei da quintar che las gallarias vegnessen donnegiadas fermamein ni schizun destruidas. Pervia da quei sto igl uffeci prender mesiras gia avon la renovaziun dallas gallarias. Il concept da mesiras cumpeglia ina siglientada da segirtad immediata per impedir che las massas da grep pudessen curdar sillas gallarias. Il medem mument duei il concept garantir che las lavurs da reparatura possien vegnir exequidas senza prighel. Las massas da grep da rodund 400 m cubic ch’ein periclitadas da curdar, vegnan allontanadas cun ina siglientada controllada.
La via sto vegnir serrada
Igl ei previu da siglientar il grep mardis, ils 12 d’october 2021. Per siglientar el e per exequir silsuenter la rumida da segirtad dil territori sto la via vegnir serrada dallas 09.40 entochen las 17.00 per scadin traffic sco era per pedunzas e pedunzs. Pervia dalla topografia difficila ed en cass da malaura eis ei pusseivel ch’il termin sto vegnir spustaus. Sco datas da reserva ein perquei vegnidas fixadas la gievgia, ils 14 d’october 2021 ed il mardis, ils 19 d’october 2021. La siglientada vegn fatga en entelgientscha culs ufficis responsabels. Ulteriuras informaziuns: www.strassen.gr.ch.
Gust da leger dapli?