Ballapei: Victorias per Schluein Glion e Trun/Rabius

Emprema victoria per Schluein Glion

El siatavel giug da campiunadi ha ei dau l’emprema victoria per Schluein Glion. Suenter la midada sil post da trenader ha l’equipa mussau ina prestaziun engaschada e ha meritau quella victoria. Las midadas tacticas dil niev trenader Corsin Cavegn han purtau fretg.

Naven dalla bial’entschatta ha Schluein Glion priu il giug enta maun e ha giugau spert ed offensiv ord ina defensiun stabila. Quei ei vegniu remunerau gia ella 5. min.. Tiziano Vinzens ha surpriu la balla cuort avon la lingia da sedisch e ha cun in siet surprendent e precis el cantun ault sittau igl 1:0. Silsuenter ei il giug s’ulivaus, las meglieras caschuns da marcar han denton vinavon ils indigens giu. Ton Ronny Della Morte sco era Tiziano Vinzens han denton munchentau fetg bunas caschuns. Cuort avon la pausa eis ei lu vegniu ualti dramatic a Crap Gries: Igl emprem ha Flurin Capaul impediu cun ina stupenta parada l’egalisaziun entras in siet naven dil punct da penalti ed ella cunterattacca ha aunc inagada Tiziano Vinzens buca dumignau da sittar il 2:0 era sch’el ha saviu cuorer naven da miez il plaz persuls encunter gol. Siu siet ha il goli frenau bravurusamein. Mo ina minuta pli tard ha quei goli sittau la balla sut pressiun exactamein ad Andri Michel els peis. Lez ha buca schau supplicar e ha alzau la balla naven da miez dil plaz sur il goli ora al 2:0.

Egl emprem quart ura suenter pausa ha l’equipa da casa buca saviu mussar la medema prestaziun sco ell’emprema mesadad. Ils hosps han nezegiau quei temps da fleivlezia dils indigens per egalisar il giug. Rilind Shala ha nezegiau ina malcapientscha suenter ina remessa laterala per sittar il 2:1 e Nurkan Ibrahimi ha sittau il 2:2, cun realisar il secund penalti ch’igl arbitrader ha schulau per St. Margrethen. Tier quei resultat eis ei restau entochen cuort avon la fin. Ils giugadurs da Schluein Glion han denton encuretg entochen alla fin il gol dalla victoria. Quei ei vegniu remunerau. Aron Büchler ha sittau ella 90. min. ina flanca liunga naven dalla vart seniastra ella zona da puniziun, leu ha Gian Sgier deviau la balla cul tgau a Serafin Bundi, il qual ha tuschau ella sur lingia al 3:2.

Beat Dermont

2. ligia regiunala, gruppa 1

Schluein Glion – St. Margrethen 3:2 (2:0)

Crap Gries. – 170 aspectaturs. – Arbiter: Aliji.

Gols: 5. Vinzens 1:0, 45. Michel 2:0, 49. Shala 2:1, 60. Nurkan Ibrahimi 2:2 (penalti), 90. Bundi 3:2.

Schluein Glion: Capaul; Dermont, Matthias Derungs, Livio Derungs, Büchler; Sgier, Michel, D’Atria ( 76. Gallmann), Bundi; Della Morte (46. Tschalèr), Vinzens (80. Gomes Machado).

St. Margrethen: Cavalcanti; Künzler, Rexhepi, Forgia, Bykov; Shoshi (16. Braun, 46. Isuf Ibrahimi), Cetinkaya, Shala, Aliu; Maliqi, Aktas (57. Nurkan Ibrahimi, 73. Gavranic).

Remarcas: Cartas melnas:  16. Matthias Derungs (foul), 40. Aktas (foul), 75. Maliqi (foul), 84. Gavranic (foul) e 85. Bykov (foul).  – Corners: 0:7. – 43. Capaul tegn penalti sittaus da Maliqi.

Clara victoria per Trun/Rabius el derbi

Da bellezi’aura d’atun ed avon ina grondiusa culissa d’aspectaturs a Pustget surpren Trun/Rabius immediat la bitgetta el derbi sursilvan encunter Lumnezia e va gia suenter gnanc duas minutas en avantatg entras Patrizio Decurtins. Il proxim gol lai buc spitgar ditg; Gianin Derungs vegn lantschaus cun in bi pass liung da Sandro Orlik e setta il 2:0 per l’equipa da casa. Gnanc duas minutas pli tard il proxim gol: Clau Berther semetta atras ed aulza il resultat sin 3:0 cun in ferm e plazzau siet. Puh, uss stuein nus trer flad inaga. Igl ei pia gnanc giugau 15 minutas e gia meina Trun/Rabius 3:0 el derbi. Ideala entschatta per l’equipa dalla Cadi ed ina pulita frida pils Lumnezians. Il CB T/R reducescha ussa empau il tempo, controllescha denton vinavon la partida e va ella 37. minuta schizun cun 4:0 en avantatg entras Damian Schmed. Da pausa dat ei pia dabia da discussiunar pils numerus aspectaturs. Suenter il te croda il nivel dalla partida. Trun/Rabius sto buc pli e Lumnezia ha miserias da vegnir tier dapli. La megliera schanza pils Lumnezians sedat entras in culp liber da Matias Alig che Mauricio Cathomas parescha denton. Ed aschia eis ei plitost in spitgar tochen che l’ura muossa 90 minutas. Cuort avon la fin tuttina aunc in ulteriur gol pil CB T/R: Patrizio Decurtins setta siu secund gol da quei di aschia ch’il resultat final munta 5:0. Trun/Rabius gudogna pia clar il derbi sursilvan grazia a cunzun ad ina ferma prestaziun ell’emprema mesadad. (cdm/fmr)   

3. ligia, gruppa 1

Trun/Rabius – Lumnezia 5:0 (4:0)

Pustget, Trun. – 310 aspectaturs.

Gols: 2. Patrizio Decurtins 1:0, 11. Gianin Derungs 2:0, 13. Clau Berther 3:0, 37. Damian Schmed 4:0, 85. Patrizio Decurtins 5:0.

Trun/Rabius: Mauricio Cathomas; Damian Schmed, Livio Janka, Ramon Orlik, Sandro Orlik; Daniel Pfister (60. Remo Alig), Mathias Flepp (62. Denis Monn), Salvatore Stagliano, Clau Berther (75. Silvan Muoth); Patrizio Decurtins, Gianin Derungs (71. Fabio Caduff).

Lumnezia: Martin Mark; Danilo Blumenthal, Tizian Casanova, Manuel Casanova, Mauro Cadonau; Matias Alig, Pascal Marc Derungs, Andriu Alig, Gion Alig, Dario Capaul; Dino Blumenthal.

Remarcas: Trun/Rabius senza Beat Cadruvi, Orlando Monn e Mirco Pfister.