Radunonza annuala da la URB a Turitg

Sin sonda, ils 16 d’october 2021 allas 10.15 envida la URB – Uniun da las Rumantschas e dils Rumantschs en la Bassa – a sia radunonza annuala. Quella ha liug en la sala dalla pleiv St. Johannes a Turitg. Sper las tractandas statutaricas vegn Lars Prevost a presentar ils resultats da sia lavur da master ch’el ha terminau la stad 2021. Per l’animaziun musicala vegn la musicista Cinzia Regensburger a procurar.

La situaziun da la pandemia ha mess sil tgau pli u meins tut las occurrenzas che eran previdas igl onn vargau. Ed uonn puspei. Il davos inscunter «real» ha giu liug avon in onn e miez. Igl ei stau quel dils 27 da favrer 2020 a Turitg. Ursin Lutz e Michele Badilatti han referiu davart il Dicziunari Rumantsch Grischun (DRG) e las sfidas en context cun la digitalisaziun. Igl ei stau impressiunont dad intervegnir co il romontsch stampau e copiau ei vegnius digitalisaus en China da dunnas che san buca romontsch mo han scret e curregiu cun agid dad algoritmus il text aschi precis ch’ei ha duvrau silsuenter paucas correcturas «a maun». Per igl accumpignament musical ha la gruppa da musica DA LOMBRIS cun Claudia Lombris e Lorenz Gabriel Aenis procurau.

Dapi lu ein neginas sentupadas cun inscunters interrumantschs stadas pusseivlas. Perquei ha era la URB fatg em­provas cun scuntradas digitalas.

Ils 28 da schaner 2021 ei per aschi da dir stau la premiera cun in inscunter digital. Igl enconuschent romanist ed autur Arnold Spescha ha ruschanau ord sia nova ovra sur dalla traversada dil Generalissimus russ, Alexander W. Suworow, sur il pass dal Veptga e las grondas e grevas consequenzas per il vitget da Pigniu e la regiun resultadas da quella campagna militara. Ca. 50 persunas han persequitau las interessantas e captivontas explicaziuns digl autur.

Ina secunda occurrenza digitala ha giu liug ils 27 da matg. Sibylle Mani (sursilvan) e Tania Zanetti (puter) han presentau lur passiunau project da cudisch: «Sagenhafter Wanderführer Surselva». Quei inscunter  digital san ins aunc adina veser cun il link che ei d’anflar sin la pagina d’internet da la URB:  www.uniun-urb.ch  sin la pagina principala. Leu secatta era il link per igl emprem «streaming» cun il «Duo Liebestoll», Marietta Jemmi e Nathan Schocher: «Tuot on november», istorgias, canzuns e poesias encunter il coller. Manegiau il coller da corona.

Alla radunonza annuala vegn il president, Roman Pfister, a schar reviver empau da quei ch’ei capitau dapi in onn. Ni era buca capitau pervia da corona. E tgei ch’ei previu per il proxim temps. Denter auter sto ina occurrenza ch’ei deplorablamein gia stada publicada ve­gnir annullada ord differents motivs, numnadamein il teater «Ina Emilie Kempin-Spyri. Tuttas Emilie». In teater che vegn daus da quater acturas da professiun en lungatg romontsch e tudestg. Quel fuss staus previus pil venderdis, ils 29 d’october. Forsa enstagl lura enzacu pli tard.

Damai che l’occurrenza da 100 onns Cla Biert (1920 – 1981), planisada per igl onn vargau era daventada in’unfrenda da la pandemia, ha liug la sera dils 4 da december 2021 a Turitg in’occurrenza da regurdientscha sur digl autur ed engaschau representant da cultura romon­tscha cun cant da sia feglia Aita Biert e Men Steiner.

Sper las tractandas statutaras ed il referat da Lars Prevost vegn la URB era a commemorar en moda mudesta siu trentavel anniversari cun in aperitiv e puschegn cumineivel, star en cumpignia, discutar, seregurdar.

Ei fa grond plascher da saver s’entupar cun biaras e biars da vus alla radunonza annuala sonda proxima, ils 16 d’october 2021 allas 10.15 en la sala dalla pleiv St. Johannes, Limmatstrasse 114, 8005 Turitg. Quella ei da contonscher a pei en ca 10 minutas, ins sa era prender il tram (4, 13, 17) entochen la fermada Limmatplatz ed in pèr pass anavos. Pervia dalla pandemia da corona ein las reglas digl Uffezi federal da sanadad da risguardar. Ord quei motiv ein tuts supplicai da disponer d’ina mascrina ed il certificat da Covid.