Sfidas futuras dovran finanzas equilibradas

Dapli custs d’ina vart e da l’autra vart dapli entradas; sut il stritg dettia quai in resultat cumportabel, èsi vegnì ditg a l’infurmaziun da las medias. Ils custs sajan creschids relativamain ferm en cumparegliaziun cun l’onn precedent, e quai pervia da l’augment da las contribuziuns a terzas persunas, ha cusseglier guvernativ Christian Rathgeb ditg a la FMR. «Quest augment da custs po dentant vegnir cumpensà tras ina probabla distribuziun dal gudogn sextupla da la Banca naziunala svizra e tras il svilup fitg favuraivel dals retgavs fiscals.» Il volumen d’investiziuns è s’augmentà levamain ed è – cun investiziuns bruttas da ferm 420 milliuns – sin in aut nivel.

Ils custs da persunal s’augmentan per 16,3 milliuns l’onn 2022. La mesadad da quella summa vegn impundida per las contribuziuns dal patrun sin fundament da la revisiun da la lescha davart la Cassa da pensiun chantunala dal Grischun. L’autra mesadad vegn duvrada per plazzas supplementaras ch’èn necessarias sco er per il svilup dals salaris per il persunal existent da l’administraziun  e da las dretgiras.

Investiziuns da 420 milliuns

Er las investiziuns dal chantun s’augmentan l’onn proxim. Ellas importan 420 milliuns. Quai èn circa 15 milliuns francs dapli che 2021. Da l’autra vart stattan entradas da bunamain 140 milliuns (onn precedent 133 milliuns). Quai vul dir ch’il chantun sto finanziar sez investiziuns nettas da pressapauc 281 milliuns. Ils projects da construcziun auta tenor preventiv 2022 èn tranter auter la renovaziun dal center da dietas Plantahof, la terminaziun dal center per l’emprima registraziun a Meiersboden, la construcziun da la nova basa da la polizia da traffic a Cuira sco er la construcziun d’in nov edifizi cumpensatoric per il stabiliment per l’allevament da peschs a Claustra.

Cusseglier guvernativ Christian Rathgeb ha ditg ch’il Grischun saja in da quels chantuns che retschaivia daners da Berna. Sco tar ils chantuns svizzers, dettia quai er tar las vischnancas da quellas che pajan e talas che retschaivian da la gulivaziun da finanzas, ha Rathgeb ditg. «L’onn proxim vegnan 38 vischnancas cun bleras resursas a pajar en la gulivaziun da finanzas bunamain 20 milliuns francs entant che 62 vischnancas cun paucas resursas survegnan tut en tut 34 milliuns.»

Svilup positiv tar las entradas da taglias

Sco perspectiva allegraivla ha Christian Rathgeb numnà l’augment dal retgav da taglias chantunalas l’onn proxim. Ils total 814,3 milliuns francs muntian 61,9 milliuns dapli che l’onn precedent. «Il minus tar las entradas da taglias sin gudogn e sin entradas che nus avain budgetà l’onn precedent pervia da la pandemia da COVID-19 è cleramain pli bass che spetgà.»

«Nus empruvain da budgetar realistic», ha cusseglier guvernativ Christian Rathgeb ditg sin la dumonda da la FMR schebain «Covid-19» e «Green Deal» na mettian betg tut sutsura il budget chantunal. «I n’è nagut da nov ch’ils numerus projects influenzeschan il preventiv. Green Deal è in da quests projects, ma là spetgain nus ina giada las proximas decisiuns dal Cussegl grond.”

Preventiv chantunal cun deficit supportabel

Martin Gabriel

L’onn 2021 avain nus budgetà pli precaut perquai che nus avain quintà cun damain entradas da taglias», ha il directur da finanzas chantunal Christian Rathgeb ditg a la FMR. Plinavant haja la situaziun economica pli favuraivla che spetgà procurà per ina meglra constituziun da las finanzas publicas. «La lavur da preparar il preventiv chantunal è vegnida pli difficila dapli il coronavirus. Nus avain gì divergenza tar las taglias, da l’autra vart ha quai dà dapli raps da Berna or dals gudogns da la Banca naziunala

Intginas datas dal preventiv 2022

• Deficit dal preventiv 9,9 milliuns (onn precedent 34,2 milliuns. Suenter avair prelevà reservas da 32,8 milliuns
• Investiziuns brutto 420,4 milliuns (onn precedent 404,9 milliuns)
• Investiziuns netto 280,7 milliuns (onn precedent 271,6 milliuns)
• Augment dals custs totals 3,3% (onn precedent 1,1%)
• Augment dals custs da persunal 4,0% (onn precedent 1,8%)
• Deficit dal quint da las vias 19,9 milliuns (onn precedent 20,0 milliuns)