En tun pli decent

«Igl ei stau neras uras da presentar l’uniforma nova dalla Musica Suraua», ha il president dalla musica, Gian Carlo Albin, detg. La dumengia vargada alla 15.30 han musicantas e musicants dalla Musica Suraua alzau la tenda ed ein marschai tras il vitg dad Uors sin la plazza avon scola en niev vestgiu. Decent stgira ei la nova uniforma cun caultscha nera e tschiep grisch. «In tschiep en colur da plattamorta.»  Sco quei che Gian Carlo Albin ha explicau al numerus publicum presents sin plaz scola. Diltuttafatg ha la Musica Suraua denton buca renviau la colur blaua dalla mondura veglia. Quei ei semussau enaquella che musicistas e musicists ein sedeliberai dil tschiep e presentau il libroc cun sdrema blaua.

Elegiu da treis propostas

Las «neras uras» dil president dalla Musica Suraua serefereschan era als bunamein 40 onns ch’ein spari dapi che la musica ei sevestgida da niev. Eleger ina nova mondura ei ina pulita sfida finanziala per ina musica. Denter 70 e 75 000 francs cuosta la mondura nova. «Senza sponsurs e donaturs eis ei buca pusseivel da sevestgir da niev.» Gian Carlo Albin ha engra­ziau en siu plaid da fiasta per il sustegn da pliras varts. Per anflar ina mondura che plai a tuttas musicistas e musicists ha la musica incumbensau in comite da far propostas. Il president dalla musica ha getg ch’il comite seigi serendius tiegl atelier da monduras cun certas imagina­ziuns co il vestgiu niev havessi da sepresentar. «Turnai essan nus denton cun tut autras ideas.» Ideas che han para perschuadiu. «La fin finala ein las 24 musicistas e musicists dalla Musica Suraua sedecidi per ina dallas treis opziuns presentadas.» Gian Carlo Albin ha getg ch’ei seigi stau interessant d’eleger il vestgiu. «Era perquei che nus havein saviu combinar certs elements dallas treis propostas.» Secapescha che la musica ei preparada per il futur. «Nus havein avunda teila en reserva per vestgir novas musicistas e novs musicists ch’entran en nossa forma­ziun.»

Concert sin plaz scola

Che la Musica Suraua sa buca mo presentar uniformas novas, mobein era far musica, ha ella mussau la dumengia vargada sin plaz scola. Sut la bitgetta dalla dirigenta, Claudia Derungs, ha la musica presentau divers tocs e denter quels duas intonaziuns che la dirigenta ha cumponiu aposta per l’uniformaziun nova. E la Musica Suraua ha demussau dabia humor. Avon che presentar l’uniforma ha ella tarmess cuort in musicist sil plaz scola en mondura rosa e cun ina capiala cun plemas monstrusas per dar triev a speculaziuns co l’uniforma nova savess sepresentar.