Il rumpacrappa ei a Crap Gries – e va puspei

La primavera vargada ha la vischnaunca da Schluein schau transportar material ord la Val da Schluein. Ils davos decennis era fetg bia serimnau ella grava dil Parlet sur la siara gronda. Sco mesira da prevenziun e segirtad eis ei stau urgent da prender ora quei material e cunquei descargar l’imposanta construcziun. En tut ha in consorzi cun pliras firmas involvadas menau rodund 11’000 cubics sil plaz entadem la zona d’industria Isla. La vischnaunca ha mess a disposiziun 3400 m2 mo pigl intent da deponer. La surfatscha ei, ensemen culla plazza da ballapei Crap Gries e la serenera Foppa, attribuida alla zona da baghetgs publics.

Calanda ha incarica limitada

L’jamna vargada ha la gruppa Calanda dalla Val dil Rein installau sil grond mantun da glera il rumpacrappa. Quel ei plazzaus mo rodund 80 meters sper il rumpagrappa dalla gruppa Montalta. La gruppa Calanda fa part dil consorzi che ha transportau a val il material. Il zercladur ei il project da descargar la siara gronda dil Parlet ius a fin ed igl era buca clar tgei che dueigi schabegiar culla glera explotada e deponida. Il consorzi lavura buca per incumbensa dalla vischnaunca, mobein per la firma Enserta SA fundada aposta per quei intent. Plirs impressaris ein semess ensemen per exequir quella lavur. «Els fan quei, e nuot auter», declara Marcus Holderegger, il president dil cussegl d’administraziun dalla Enserta SA. El pren posiziun silla curella ch’ei d’udir ella Foppa. «Na, la gruppa Calanda surpren buca la cava da gera Schluein SA», gi el da detschiert. Sin damonda dalla FMR conferma el che la Calanda seigi ina dallas firmas involvadas. «Ella ei ina partenaria da fatschenta, denton buca dapli», aschunta Marcus Holderegger.

Che la gruppa Calanda dueigi stuschar Montalta ord la cava da Schluein ei tenor Marcus Holderegger nuot auter ch’ina curella iertga. Ch’ella surprendi la cava da gera Schluein SA lubeschien las concessiuns ed ils contracts gnanc. La cava s’auda alla gruppa Montalta, quella ha la concessiun exclusiva d’explotar ed elaborar il material ord il Rein. La maschina da rumper crappa elaborescha il grond cuolm ch’ei semtgaus. Martin Montalta, commember dil cussegl d’administraziun dalla gruppa Montalta, puntuescha pertuccont la curella che la gruppa Calanda surprendi la cava da Schluein: «Na, quei vegn buca en damonda».

Tgei schabegia cul material?

Il rumpacrappa dalla Calanda exequescha ina lavur specifica limitada. Ils camiuns blaus cul logo dalla gruppa han fatg ina part dils transports. La concessiun dalla vischnaunca da Schluein ei era limitada per in auter motiv: la parcella publica lubescha ni baghetgs ni implonts stabels. Ella ei era planisada per in auter intent che quel d’explotar material.

Incumbensa actuala dall’Enserta SA eis ei d’elaborar e commercialisar il grond mantun dad 11’000 cubics denter plazza da ballapei e serenera. Selai quel lu era duvrar, co eis ei culla qualitad? La risposta dat gl’impressari Martin Casutt. El fa medemamein part dil consorzi che ha transportau il material ord la Val da Schluein. La maschina da rumper crappa dalla gruppa Calanda ei en acziun dapi l’jamna vargada. Finamira seigi da duvrar quei material per la construcziun bassa, sco material da secunda classa seigi el segiramein adattaus, declara Martin Casutt. Ils resultats dallas emprovas ch’ins hagi fatg l’jamna vargada ein aunc buca enconuschents, aschunta gl’um dil fatg. Las analisas dueigien cumprovar che la glera ei d’emprema qualitad – e cunquei da valur per planar ed emplenir.