54 onns en survetsch dalla Distec SA a Mustér

Ina carriera fetg liunga e cun bia success va a fin tier la Distec SA a Mustér: Suenter 54 onns en survetsch dil menaschi va Marcus Candinas en pensiun. Ils 10 d’avrel 1967 eis el entraus egl emprendissadi sco fravi d’uaffens. Da lezzas uras aunc tier la Landis e Gyr. Il luvratori sesanflava lu el sutterran dalla halla Cons a Mustér. Il tierz e quart onn d’emprendissadi ha Marcus Candinas absolviu a Zug nua ch’el habitava ella dimora per emprendists. Suenter igl emprendissadi ha el luvrau dus onns tier la Landis e Gyr a Zug avon ch’el retuorni a Mustér. Leu ha el recaltgau grondas e bunas enconuschientschas sin differents secturs tecnics. A moda autodidactica eis el era seperfecziunaus ella materia d’erodar e ha aschia concepiu da funs ensi successivamein quella partiziun. «Las regurdientschas a quei pensum vegnan segiramein ad accumpignar vinavon el, damai che quell’occupaziun ha fatg grond plascher ad el», scriva la Distec SA en ina communicaziun als mieds da massa. Ella vegliadetgna da 70 onns e suenter 54 onns engaschament professiunal va Marcus Candinas en pensiun. «Sia gronda experientscha ella construcziun da fuormas vegn segiramein a muncar a nus», puntuescha la Distec SA. La direcziun ed ils collaboraturs dalla Distec SA engrazian a Marcus Candinas per la lavur ch’el ha adina exequiu en ina fuorma aviarta e ruasseivla, giavischond ad el buna sanadad e cletg ella nova fasa dalla veta. «Duess Marcus Candinas tonaton haver liunguriala eis el beinvegnius da tut temps el luvratori dalla Distec SA», scriva l’interpresa.