Brev or dall’isolaziun

Ansasez vaia gia planiso ensatge tot oter. Ia leva screiver ena columna davart aspects positivs tgi la pandemia po er purtar. (Ia amprov da duvrar schi pac scu pussebel igl pled c…, ampurmess!) Per exaimpel lubescha la crisa actuala da visitar martgeas tgi nivan inundos oters onns da turists da tot igl mond. Venezia è egn da chels martgeas tgi è, graztga alla situaziun actuala manc inundo da turists (ma igl prievel dad eir sot resta naturalmaintg). Cler, sen la piazza San Marco è tuttegna ena massa gliout, dantant mantgan las gruppas tgi suondan mintgamai la bandierigna da lour guidadra. Igl è perfign pussebel dad eir a spass ainten tschertas giassas strètgas sainza antupar olma. E cugl «Green Pass», igl pendant tigl noss certificat da Covid, sa dervan er las portas saradas da museums e restorants.

Scu detg, ansasez leva screiver davart tot chellas varts positivas. Ia vei numnadamaintg gugent la vart positiva ainten tge situaziun er adegna. Ossa sunga dantant digl tottafatg positiva, ma agl senn negativ. Ia e mia famiglia ischan an isolaziun perveia da c. Na, chegl è nign souvenir da Venezia. La veia dalla derasaziun è stada ena veia svizra aint igl ravogl famigliar, sur igls unfants tgi pon betg anc sa schurmager cun ena virola. Ia mezza sung virolada, ma igl virus è sto pi ferm!

Tot murmagnem vala navot. Igl è da pansar da nov positiv, malgro la situaziun (mademamaintg positiva). Tge far? Diesch deis isolaziun totala cun dus unfants pudess esser ena detga sfidada. Igls amprems deis vagn nous gio survivia, fisicamaintg e psichicamaintg. Am pudez dumandar an en’emda, alloura tungigl forsa different.

Ma basta. Turnagn tigl positiv digl esser positiv. Nous vagn da far navot oter tgi star a tgesa. Nous vagn peda l’egn per l’oter, faschagn tarmagls cun lego, vivagn aint per igl de, sainza vurdar sen l’oura. Graztga a Netflix, Spotify ed Onleihe vagn nous er ena videoteca, audioteca e biblioteca privata ainten tgesa. E cugls sarvetschs digls grossists vagn nous er betg da mureir dalla fom.Igl positiv ve dall’antiera situaziun è er, tgi ossa, siva tg’igl mal agl tgea tschessa planget ed igl nas cala da correr, ins ò er taimp da liquidar l’egna u l’otra pendenza. Tranter chellas er chella columna.

Igl tema vaia gio nudo «Viagier an taimps da c.». Igl è nia oter, scu tgi vez gio pudia liger. Curt siva igl resultat positiv vaia alloura proponia alla redacziun da screiver ena columna noscha davart tot chels e chellas tgi sa laschan betg virolar e riscan uscheia da purtar anavant igl virus. Ma an chel mument ò igl schefredactour scunsiglia da screiver or digl effect dalla situaziun. El ò gia raschung. Ia vess cun ena tala columna forsa lantschea ena debatta pro e contra. Perchegl Az tarmetta ena brev mievla or dall’isola­ziun cun numnar er l’egn u l’oter patratg positiv.

Ste se leghers e raste sangs!