Melchior el Mundaun a Morissen

Gl’anteriur hotel Mundaun sepresenta dapi in onn sco edifeci marcant sisum il vitg da Morissen. Igl ei denton buca in hotel public. Tgi che vul passentar leu vacanzas sto esser commember dil «Country Club». Semegliont al concept da Hapimag ni auters sistems da commembradi san ins secumprar en el club cul dretg sin albiert ina ni pliras gadas ad onn. Il menaschi gastronomic a Morissen ei vegnius enconuschents dapi sia avertura sco «Lampart’s Country Club». Ensemen cun otg collaboraturas e collaboraturs meinan Anni e Reto Lampart la casa. Da principi eis ei in hotel el stil da «boutique». Ils hospitonts collavuran cun producents dalla Lumnezia, els ein s’etabli el vitg e sesentan da casa ella vallada.

Premi per gastronomia ed architectura

La casa culla tuoretta e fatschadas curcladas cun slondas secumpona da tschun suitas. Ella casa ha ei ina biblioteca, in tschalèr da vin ed ina zona da wellness. Ina spaziusa sala da magliar cun cuschina aviarta s’audan tiel concept d’ina gronda casa da famiglia. «Igl ei ina oasa dil temps, en in ocean da ruaus», proclameschan ils possessurs Tanja e Simon Osterwalder. Els ein tut cuntents dils resuns ch’ei ha dau suenter l’avertura. Daferton ha gl’anteriur hotel Mundaun renovau retschiert divers premis per prestaziuns d’architectura e gastronomia.

Forsa gest entras corona semuossa quella casa a Morissen per glieud dalla Bassa sco refugi els cuolms dil Grischun. Tgi che passenta leu vacanzas, enquera in ambient individual e vul guder gl’ambient famigliar-luxerius. Per commemorar l’avertura d’avon in onn han ils possessurs organisau sonda vargada ina tscheina litterar-musicala per indigens e hosps.

Colligiaus culla Lumnezia

Per Tanja e Simon Osterwalder eis ei era stau la caschun da finir la stagiun da stad ed ir viaden en quella d’unviern. Per quella caschun han els envidau gl’autur Melchior Werdenberg. Il num ei il pseudonim digl advocat Hans Baumgartner. Il giurist ei carschius si ella Svizra orientala. Siu bab era guardia-cunfin e la famiglia ha stuiu dislocar cuntinuadamein d’in post da cunfin a l’auter. Sco el ha raquentau eri siu refugi da buob tiel tat e la tatta el Kleintal, entadem Glaruna. Da quei raquenta el en sias historias cuortas ch’el edescha ella tier la casa editura Elster & Salis. Quella edescha denter auter ils cudischs digl autur da success Thomas Meyer.

L’advocatura Baumgartner Mächler a Turitg ei sespecialisada el dretg penal economic. Il hobi principal da Hans Baumgartner ei denton la litteratura. El scriva «short storys», historias cuortas e raquents ord sia veta, quella da carstgauns ch’ein curdai, dil mintgagi e da ficziuns. El decuors dalla sera ha Hans Baumgartner era tradiu siu ligiom culla Val Lumnezia. La vallada seigi sia secunda patria. Siu bab era in bien amitg da Gieri Capaul (1925-2013), commerciant e posteriur president communal da Lumbrein. Duront la tscheina ha gl’autur prelegiu historias cuortas da plirs dils cudischs ch’el ha publicau cul pseudonim Melchior Werdenberg. Il musicist argovian Goran Smitran ha accumpignau la prelecziun cugl accordeon.