«Jeu e ti ed jeu ed el»

El hagi studegiau cun Christina Riesch, raquenta Dominique Huber el discuors culla FMR. La pedagoga da musica da Trin ha intimau il Turitges da contactar Flavia Walder da Sevgein. Sin quei ha il dirigent, pianist e pedagog da musica, empriu d’enconuscher la menadra dil Chor d’affons da Sumvitg. Ils da Sumvitg ein daventai part da melli affons ch’ein separticipai al project «Liedli» da Dominique Huber. Quel ei musicist diplomau, ha pli tard fatg la scolaziun da pilot e luvrau en quella professiun tier la Swiss.

Varga 100 canzuns

Suenter il lockdown dil mars 2020 han ils pilots stuiu restar a casa. Aschia era Dominique Huber. Grazia a sia creativitad e sia reit da contacts sco musicist ha el viu il mument da realisar ina visiun ch’el haveva. Sco coniniziant ha el saviu gudignar Andrea Semadeni. Il scolast primar grischun habitescha ad Igis ed haveva, sco Huber, midau professiun suenter la patenta da scolast. Era el ei capitani d’in grond aviun che sgola sin distanzas liungas.

Ensemen vulan ils dus babs realisar lur project «Liedli.ch». Tochen la fin digl onn duess quel ir a fin. Il musicist Dominique Huber haveva s’encurschiu, tras ses agens affons, che las bialas canzuns tradiziunalas svizras druvassen niev slontsch. Sia visiun ei sesviluppada ad ina idea, da leu eis ei buca stau lunsch tiel project concret. Dapi in onn e miez fatschenta quei project bravamein il musicist, Andrea Semadeni sustegn el sco organisatur. Daferton han els produciu sis discs cumpacts cun ina collecziun da pli che 100 canzuns dalla Svizra tudestga. Tenor tematicas ein las registraziuns repartidas ella tematica dallas stagiuns, canzuns da sedurmentar, canzuns legras e cun ritmus e canzuns d’animals. In disc cumpact ei cumparius cun canzuns pil temps da Nadal.

Chanzunettas, project parzial

«Schlaf Kindli schlaf», «Heile, heile säge», «Es wott es Fraueli z Märit gah» e tozzels autras commuentan e dattan in sentiment famigliar e schurmegiau. Ellas fan part dallas regurdientschas intimas d’ina biala affonza. Las registraziuns professiunalas ha Dominique Huber fatg cun varga 50 chors d’affons e da scolars dalla Svizra tudestga.

Era in chor d’affons romontsch ha cooperau tiel project «Liedli». Tras il Chor d’affons da Sumvitg ha gl’um da Turitg empriu d’enconuscher ina nova cultura cantica. Canzuns e canzunettas d’affons han en tiara romontscha buca dameins tradiziun che en tschellas. Christina Riesch haveva recumandau a siu collega da studi d’includer il chor da Flavia Walder. La dirigenta haveva saviu perschuader siu chor da separticipar. «Duront las registraziuns dallas canzuns tudestgas ha Flavia rendiu attent mei ch’ins savessi risguardar era tschels treis lungatgs naziunals», raquenta gl’iniziant. La finala eis el sedecidius da slargiar il project oriund cun in parzial numnaus «Chanzunettas».

Tschun chors, tschun idioms

Canzunettas d’affons seigien in bein cultural ch’ins stoppi tgirar specialmein, manegia Dominique Huber. Tochen lu hagi el buca giu contact cul quart lungatg naziunal, lai el valer. Equipaus culla tecnica da tun eis el viagiaus l’jamna dils 4 tochen ils 8 d’october tras il Grischun. A Trun ha el registrau quater canzuns sursilvanas cul Chor d’affons da Sumvitg. Ch’el risguardi tut ils idioms ei stau clar naven dall’entschatta. Cun quater chors ha el registrau varga in tozzel canzuns. «Jeu sun fetg surstaus con divers ch’ils idioms ein», declara gl’um dalla musica. El cartevi che romontsch seigi ina certa unitad, quei svarieschi denton pulitamein.

Sper il Chor d’affons da Sumvitg ha el visitau il Cor d’uffants da Scuol e contuorn dalla dirigenta Nina Mayer. Lu eis el staus Ell’Engiadin’aulta tier Las Filomelas da Ladina Simonelli e Selina Bontognali. A Samedan ha el registrau canzunettas egl idiom putér.E culla «Bargeda» da Maria Capeder en Surses la finala quater canzunettas surmiranas. Gest oz gievgia ei Dominique Huber a Domat. Leu registrescha el cun Christian Klucker e la «Stimmwerkbande» ulteriuras treis tochen quater canzuns egl idiom sutsilvan. «Tuttas registraziuns romontschas vegnan ad esser tochen la fin digl onn sin nossa plattafuorma ‘Liedli.ch’», declara Dominique Huber.