Il secretariat e l’opziun da vendita

Per la radunonza d’atun dalla vischnaunca burgheisa ha il president Ursin Fetz saviu beneventar biebein 80 persunas ella halla polivalenta Tircal. El ha beneventau ils presents per romontsch e tudestg e detg che la vischnaunca burgheisa adempleschi incumbensas pil beinstar da tuts e tgiri l’ierta dils perdavonts. ­Attenziun speciala gaudi «il lungatg romontsch, la cultura e las tradiziuns da nies vitg». Las sesidas vegnien menadas per romontsch e perquei seigien bunas enconuschientschas dil romontsch ina premissa per la plazza dil secretariat, ch’ei vegnida pretendida. La radunonza ha approbau unanimamein la plazza parziala.

Cumpetenza per cussegl dils burgheis

Ina fatschenta impurtonta ei stau la prolungaziun dalla cumpetenza dil cussegl da vischnaunca per vender u dar giu sulom el dretg da baghegiar ella zona d’industria Vial che sesviluppescha zun positiv. Dils oriundamein 215 000 m² ein actualemin aunc 155 000 m² disponibels. Da quels ein 76 000 m² reservai per ina opziun d’ina resgia. Il cussegl ha dumandau da prolun­ghir quella cumpetenza dada ils 2018. Pervia dalla damonda, schebein ei drovi l’opziun vendita, hai dau ina viva discussiun. Il president dils burgeis Ursin Fetz sco er il president da vischnaunca Erich Kohler han fatg attent sils problems ch’ei dat el cass dil retuorn al proprietari e ch’ins savessi baghegiar cul recav dalla vendita habitaziuns per schar a tscheins, quei che porti cuntinuadamein entradas. La damonda da strihar l’opziun da vendita ei vegnida refusada cun 66:7 vuschs ed ins ha surdau al cussegl da burgheis la cumpetenza pretendida.

Damondas per contribuziuns

Il cussegl ha er stuiu sefatschentar cun differentas damondas per contribuziuns. Tuttas ein vegnidas approbadas unanimamein, aschia era quella da 50 000 francs al club FC Ems per renovar il pastget artificial.

La «parada da hits» dallas schatteinas da Domat muossa sisum il num Jörg cun 82 persunas, suandaus da Federspiel (79), Willi (78), Fetz (71), Seglias (47), Brunner (36). Alla fin dalla radunonza ein ins sesius ensemen da cumpignia ella Sentupada, nua ch’ins ha fatg viva cun u grazia al certificat sil passau e sigl avegnir. (cw/fmr)