«Nossa visiun ei ina casa per tuttas generaziuns»

L’iniziativa da realisar ina canorta ei vegnida dalla suprastonta Elisabeth Lorez. Ei havevi numnadamein dau dabia damondas alla vischnnaunca en quella direcziun. Aschia ein l’Uniun Cumbiniala vegnida fundada: «Corona ha frenau nus, l’uniun ei vegnida fundada a moda virtuala e biaras da nossas sesidas han stuiu haver liug online», declara Corinne Weishaupt, la presidenta dall’Uniun Cumbiniala. Sco emprem porscha quella ussa la canorta ellas localitads dall’anteriura pratica da miedi a Vella. Muort las circumstanzas en connex culla pandemia dumbra l’Uniun Cumbiniala il mument sulet nov commembras e commembers. Quei dueigi denton semidar proximamein. Tenor Weishaupt muncava ina canorta il pli fetg ella Val Lumnezia e perquei hagi la realisaziun da quella giu prioritad. La finamira seigi denton da cumpletar la cumbiniala cun ulteriurs tocs dil puzzle. «Nossa visiun ei ina casa per tuttas generaziuns. Il pli bi fuss ina cuminonza e sch’ils ins sustenessen ni tenessen cumpignia als auters. Quei savess per exempel esser tats e tattas che segidassen ella canorta. Lur engaschi vegness apreziaus ed ei havessen cumpignia dils affonets ed el medem mument era il sentiment da vegnir duvrai.»

Cumbiniala per affons

Ina buna purschida pils affons ei scaffida, ils basegns e giavischs dalla giuventetgna vegnan evaluai il mument ed era ils seniors e las senioras s’entaupan proximamein per discutar da lur giavischs e basegns. Ils hosps dalla sonda han saviu prender investa dallas localitads, claras e bein surveseivlas cun mobigliar funcziunal e stabil.  La canorta ei aviarta gliendisdis, mardis, gievgia e venderdis mintgamai dallas 6.30 entochen las 18.00. Ella porscha 12 plazs per affons pigns da treis meins entochen ella vegliadetgna da scoletta. Actualmein vegnan ils pignets per in di e miez ella canorta. La media da vegliadetgna ei dus onns e miez. Dalla structura dil di profiteschan actualmein sis affons ed alla meisa da miezdi prenden en media 20 affons per di part. Tenor Nina Capaul, ch’ei la responsabla pil ressort canorta dalla Cumbiniala ei la purschida fruntada sin grond interess. Ella sezza seigi leda d’haver la pusseivladad da dar giu ses affons en Lumnezia. Capaul lavura a Flem e ses affons visitavan entochen dacheu la canorta a Laax. Actualmein visetan 20% dils affons pigns dalla val la canorta. A Cuera ein quei 30%. «Quei ei dètg bien per haver entschiet pér avon strusch treis meins», puntuescha Corinne Weishaupt.

Canorta aviarta per hosps e vischins

La canorta a Vella vegn menada d’Irene Schmutz e dalla co-menadra Selina Giger ch’ei ensemen cun Michèle Solèr responsabla per la tgira dils affons. Duront la meisa da miezdi ni tenor basegns vegnan ellas sustenidas da Carin Cavegn e Corina Alig. Il mument ha la canorta Cumbiniala aunc empau capacitads e vul perquei era schar nezegiar la purschida famiglias dallas vischnauncas vischinontas sco per exempel Ilanz/Glion ni era da Sursaissa Mundaun. Hoteliers e hosps hagien gia mussau interess e las menadras dalla Cumbiniala quentan cun dapli frequenzas duront il temps da vacanzas. La canorta seigi ina buna purschida turistica per las famiglias.

Promoziun

Tenor Nina Capaul vul l’Uniun Cumbiniala generar plivalur per l’entira Val Lumnezia. Cun purschidas sco la canorta sappien ei contribuir alla depopulaziun e forsa secasien perfin novas famiglias en Lumnezia sche la purschida per affons e geniturs constetti.  La Canorta porscha plinavon ensemen culla Lia Rumantscha ina promoziun tumpriva dil lungatg. «Tier nus san affons da famiglias d’auters lungatgs emprender romontsch gia avon ch’ei van a scola», declara Capaul. Sco ella e Weishaupt puntueschan, vul l’Uniun era surprender la rolla dall’intermediatura denter generaziuns e per la glieud dils differents vitgs. «Ei dat gia massa ch’organiseschan ina caussa ni l’autra, mo auters che nezegiassen forsa era bugen quei, san gnanc ch’ei dat ei»,  aschia las dunnas che han en mintga cass aunc ina massa lavur avon che la Cumbiniala seigi messa ensemen toc per toc.