Las finanzas sun il problem
Cooperativa Butia Tarasp
Daspö divers ons sun ils respunsabels da la Cooperativa Butia Tarasp landervia a lantschar ün proget Cafè I Butia. Il böt füss d’amegldrar la sporta da la butia e da realisar ün pitschen local a l’entrada cun ün pêr maisas da restoraziun.
Davo cha la Lagrischa SA nun es plü statta pronta da manar inavant la butia a Tarasp pervi da cifras cotschnas han ün pêr iniziants proponü da realisar üna cooperativa. Quella es gnüda fundada in november dal 2005. Davo cha la posta da Tarasp ha serrà sias portas es quella gnüda integrada illa butia. Quellas duos püttas ed ün bun menaschi han lura sgürà l’existenza da la butia.
Indigens ed impustüt esters chi han segnà aczias sun ils portaders da la coorperativa. Ils problems per la butia sun cha divers indigens fan lur cumischiuns a Scuol, cha l’Hotel Tarasp immez cumün es serrà daspö blers ons ed eir il chal da las pernottaziuns turisticas. Fingià avant var ses ons as discurriva d’üna butia nouva.
Proget Cafè I Butia
Il stabel immez cumün a Fontana ingio cha la butia es dachasa appartegna al cumün da Scuol e vain surlaschà a la butia per ün fit radschunaivel. Ün proget Cafè I Butia es in discussiun daspö bundant duos ons ed intant exista ün stüdi-preproget chi prevezza cuosts da bundant ün milliun francs. Sco chi’d es gnü infuormà a l’ultima radunanza s’ha la suprastanza da la cooperativa, insembel cun Riet Fanzun, cunfondüda l’on passà cul proget. «No vain intant realisà sper il proget eir ün concept da finanzas ed eschan da l’avis cha la cooperativa dess star davo quist proget e provar da rablar insembel 300 000 francs sco chapital agen per avair vistas da survgnir credits dad otras instituziuns. Quai eir impustüt sco signal vers inoura», ha dit il suprastant Romedius Alber. Per esser sgür cha l’import previs basta s’haja incumbenzà la firma da cussagliaziun «gutundgut» cun Christian Müller chi ha gnü seguaint resultat: «No vain examinà il proget e las finanzas ed eschan gnüts a la conclusiun ch’üna finanziaziun da bundant ün milliun francs sarà greiv realisabla.»
Ils associats sun uossa dumandats
La suprastanza ha lura decis cun l’acconsentimaint da la radunanza da far la dumonda als associats da’s partecipar vi da la finanziaziun e da tscherchar ulteriurs donatuors. Pels associats voul quai dir in media ün import da var 2000 francs. Cun ün e-mail, sün via postala e cun formulars in butia, es gnü lantschà l’intent. Il resultat nun es amo dal tuot concret e muossa intant ün import confermà dad 80 000 francs. L’idea füss cha quels chi sun pronts da’s partecipar segnessan aczias liadas al proget chi gnissan pajadas inavo, scha’l proget fess naufragi.
Ulteriuras infuormaziuns suot www.butia-tarasp.ch.
Gust da leger dapli?