Schluein: Ateliers aviarts sil Löwenberg

Dapi in temps hospitescha il casti da Löwenberg era localitads per la lavur creativa. L’uniun Surselva Impact Lab pussibilitescha quei ad artistas ed artists dalla regiun. Ella vul cunquei buca mo accentuar la sparta dall’economia. Finamira eis ei d’integrar era las spartas art e cultura, da sclarir ils basegns, d’organisar exposiziuns, mo en emprema lingia da metter a disposiziun stanzas per luvratoris ed ateliers. Sis ateliers ein gia s’installai el Löwenberg. Treis artistas e treis artists, da cuminonza cun musicists, envidan ad in gi dallas portas aviartas. Cun in program musical, cun guidas atras la casa, cun discuors e cun observar il menaschi, duei la populaziun saver emprender d’enconuscher quei niev spazi creativ. Gl’atelier aviert sil Löwenberg a Schluein entscheiva sonda proxima, ils 6 da november 2021, allas 13.00. Ei suondan guidas tras la casa, naven dallas 17.00 ei la bar Löwenberg aviarta ed allas 19.30 sunan Andi Schnoz e Marc Jenny cun lur band Darkbeat meets Soundwalker. Löwenberg Art, cun Claudia Bischofberger, Marc Bundi, Luis Coray, Daniela Demarmels, Yvonne Gienal, Simona Hendry e Phil Lofthouse selegran dallas visetas.(fmr/abc)