Jeu sesentel discriminaus

Dacuort haiel legiu in inserat per in emprendissadi da vendider. Jeu sundel s’annunziaus. Suenter varga 30 onns el schurnalissem e paucs onns avon la pensiun fa ina midada professiunala segir buca donn. Haiel tertgau. Mo la risposta ei stada negativa. Discriminaziun!

Miu meglier amitg ha denton getg che quei hagi da far nuot cun discriminaziun. Jeu hagi semplamein buc adempliu las premissas.

Sinaquei sundel s’annunziaus sco professer da fisica ad ina universitad da Turitg. Jeu enconuschel numnadamein Albert Einstein (also buca persunal, aber jeu sai tgi ch’el ei e ch’el ha inventau la formula «E = mc²»). Buc idea, tgei che quei munta, aber igl ei ina fuormla ualti enconuschenta. Puspei han ei buca priu mei. Discriminaziun!

Miu bien amitg ha danovamein manegiau che quei hagi da far nuot cun discriminaziun. Jeu hagi semplamein buc adempliu las premissas.

Ch’Alain Berset duess seretrer sa tut tgi che legia medias seriusas e leu particularmein las colonnas culs commentaris. Aschi in miserabel cusseglier federal havein nus aunc maina giu.

Per che la Svizra mondi buca diltut alla malura sundel s’annunziaus tier il president da la Confederaziun, Guy Parmelin, e getg ad el ch’jeu seigi prompts da remplazzar Berset. Tudestg sappi jeu numnadamein minimum aschi bein sco els dus. Aber Parmelin ha rispundiu: «Isch gann sie leider nischt einschtellen. Es schdimmt swaaar, dass jeder Schweizer und jede Schweizerin wällbaaar ist, aber suerst das Parlament muss sie wählen. Das wird schwiiirysch. Sie aben geine politische Ervaaahrung.» Mes onns ella suprastonza communala da Morissen valan pia nuot. Turpegius, aschi ina risposta d’in president dalla Confederaziun. Discriminaziun!

Miu amitg ei denton staus d’in auter avis. Jeu hagi semplamein buc adempliu las premissas.

Suenter ton frust haiel vuliu sedivertir per vegnir sin auters patratgs. En in’ustria a magliar bein, forsa en ina bar e beiber in per emblidar – ad in giug da hockey ni ballapei per saver grir. Mo senza certificat ei stau da far nuot. Discriminaziun!

Tgei che miu anteriur amitg ha getg poss jeu uss buca repeter.