Ulterioura tarada

Gion Nutegn Stgier/FMR

Danovamaintg ò igl Club da hockey Lai/Valbella gia da bandunar igl glatsch sainza success. Cunter Dürnten ò l’equipa digl li turistic pers cun 5:2. La raschung tgi igl team ò casso en’ulterioura tarada è tgi schanzas da far gols èn stadas avant mang an en cuntign, dantant sainza profit. Vetiers è nia tgi eneda daple ò mantgea tigls giuieders das Lai/Valbella la disciplina segl glatsch. Perveia d’en castei cunter Raoul Dünser on igls Grischuns alloura er casso igl 1:0 siva 11 minutas. Aint igl terz da mez ò Lai/Valbella mantganto ples gedas da far igl amprem gol. Persiva survagnia gist dus gols. Igl 2:0 pigl team indigen è curdo ainten la 31avla minuta. Siva 35 minutas ò Enzo Monstein gia da passantar dus minutas segl banc da castei. An surdomber è alloura reuschia a Dürnten da signier igl 3:0. Curt siva tgi las dus equipas èn turnadas dalla sagonda pôssa segl glatsch è reuschia agls Grischuns da far, cun en om daple, igl amprem gol. Siva da chel ò Lai/Valbella fatg pulit pressiun, augmento igl tempo e chegl cun success. Ainten la 49avla minuta ò Livio Roner marco an surdomber igl sagond gol pigls giasts digl Grischun central. Da far igl pari è tuttegna betg reuschia. Chegl er cun signier Dürnten anc dus gols curt avant la fegn digl gi tigl resultat final da 5:2. Da menziunar è tgi igl 5avel gol ò l’equipa indigena fatg aint igl gol veid digls giasts, cun aveir ramplazzo Lai/Valbella igl goli Sergio Collet antras en ulteriour attatgeder.