Concert pil centenari dalla Societad da musica Danis-Tavanasa
Cun in concert ha la Societad da musica Danis-Tavanasa festivau la sonda vargada il tierm da 100 onns da si’existenza. Dirigent Hugo Schär ha encuretg ils tocs da musica presentai dils da Danis-Tavanasa allas fiastas districtualas da pli baul.
La tiarza gada eis ei gartegiau da menar atras il concert festiv sco fiasta da 100 onns Societad da musica Danis-Tavanasa. Ord motivs enconuschents han las producziuns previdas la primavera d’uonn e digl onn vargau buca saviu vegnir fatgas. La fiasta dalla sonda vargada ei dedicada al 101avel onn ed il publicum ei vegnius en retschas serradas per festivar l’uniun dils dus vitgs. In’egliada sils nums dallas musicantas e dils musicants relatta ch’ei setracta d’in’uniun regiunala. Quei ei a Danis-Tavanasa buca auter ch’en auters vitgs dalla regiun. Ils commembers activs dallas musicas vegnan per part neutier ord ils vitgs vischinonts. Alla musica da Danis-Tavanasa ein cunzun musicantas e musicants da Rueun s’affiliai suenter che la musica da Rueun ei sligiada. Ord tala raschun enramescha la Societad da musica Danis-Tavanasa era las fiastas ecclesiasticas dalla pleiv da Rueun.
La retrospectiva musicala sin ovras sunadas allas fiastas dil district
Il publicum dalla sera festiva ei vegnius ord la regiun naven da Val sogn Pieder tochen Mustér. Ils presents han gudiu in plascheivel concert. Dirigent Hugo Schär ha fatg cun sias musicantas e musicants in viadi sur l’epoca dils 100 onns d’existenza dalla societad. En ina broschura da fiasta ha el rimnau interessantas reminiscenzas ord ils protocols vegls ed illustrau il cudischet cun fotografias tier ina cronica pil giubileum da 100 onns. Ils tocs dil concert ein era stai ina retrospectiva dad ovras las qualas la Societad da musica Danis-Tavanasa haveva sunau a caschun da fiastas da musica districtualas. Igl artg ei tratgs naven da 1925, cul toc «Der Traum des Pilgers» da Emil Ruh tochen tier l’ovra «Dakota» da Jacob de Haan, la quala era preparada per la fiasta districtuala a Vignogn 2020. Quella fiasta ei vegnida annulada ord ils medems motivs sco tuttas s’entupadas culturalas digl onn vargau. Dirigent Schär ha surdau al publicum l’incarica dils experts da dar il pareri e la nota per la producziun. Il grond applaus havess maneivel tunschiu per in «fetg bien» tochen in «excellent». La critica havess cunteniu laud agl entir corp musical per in bi tun cumplein, per la dinamica e speciala menziun dallas singulas solistas e solists. Sin giavisch dil publicum ha la musica aschuntau treis tocs supplementars al program previus, in ulteriur indeci che las producziuns ha plaschiu als presents. Cugl arranschament dalla canzun «Thank you for the music» dad ABBA han las musicantas e musicants engraziau al publicum per sia presenza.
Cuntinuar culs ideals dil vargau
Dapi 1997 diregia Hugo Schär la muscia da Danis-Tavanasa. El survegn in laud ed engraziament special dils commembers e president Clau Maissen fa menziun dil grond engaschi da Hugo pe la societad culturala. Schär ha giu in fin sensori d’eleger biala musica che fa plascher da sunar e da tedlar. Acrobatica da Brass Band ei buca stada sin program mobein bials marschs tradiziunals, uverturas, corals ed autras variaziuns musicalas. Clau Maissen ha menziunau ils ideals ch’ein stai decisivs per la liunga veta dall’uniun. Igl idealissem dils fundaturs igl onn 1920 che han stuiu cumprar instruments, la solidaritad dils avdonts dils vitgs e dallas musicantas e dils musicants sch’ei va per segidar tier ina ni l’autra occasiun. Igl engaschi ei cumpogn ella veta per crear cuminonza. Quel sto buca adina esser remuneraus cun daners. Il sentiment da far enzatgei bi, far plaschers da cuminonza ed esser solidarics en in’uniun dat satisfacziun al carstgaun. In film ha mussau bialas sequenzas ord la historia dall’uniun. Charly Caduff ha mess ensemen las reminiscenzas en tun e moviment.
Las producziuns dallas musicantas e musicants e la solidaritad dalla cuminonza culturala dil vitg e regiun san esser petgas motivontas per generar in avegnir alla Societad da musica Danis-Tavanasa. Il giubileum da 100 onns ei cheu per honorar ils protagonists d’antruras, engraziar alla populaziun ch’appreziescha la lavur dall’uniun mo era per tschaffar la forza ord l’experientscha fatga e menar l’ovra culturala egl avegnir.
Gust da leger dapli?