Per finir e per entscheiver

«La realitad ha sfurzau e motivau nus d’agir aschia», ha Marcus Caduff declarau el decuors da siu referat. Circa 80 persunas han priu part sonda suentermiezgi ella halla plurivalenta a Cuort/Meierhof alla sentupada cun el. L’uniun Treffpunkt Obersaxen Mundaun ha buca vuliu spitgar pli gitg cun organisar ina nova occurrenza d’informaziun per hosps ed indigens. Il turissem ei per l’economia populara dil Grischun d’impurtonza existenziala. Gest l’unviern vargau ha la Regenza grischuna stuiu batter vehementamein per quella. Havess il Grischun serrau – pervia dalla pandemia e decrets da Berna – ses territoris da skis, havess l’economia piars entuorn 2,3 milliardas creaziun da valur.

Il squetsch seigi staus enorms, ha Marcus Caduff confermau. Ins haveva avertiu el sco schef dil departament d’economia ch’ils accidents da skis prendien naven las capacitads els spitals. Cun ses uffecis e culla branscha turistica eis el staus en contact permanent. Ils accidents da skis hagien el Grischun negina influenza sillas capacitads ellas staziuns intensiva, ei stada la conclusiun en quels meins da crisa e malsegirtad.

Il president communal Ernst Sax ha dau informaziuns d’emprem maun ord casa communala. Per la stagiun d’unviern 2021/22 ha el rendiu attent allas loipa da Flond. Quella porscha da niev quater pusseivladads da trenar e guder quei sport d’unviern. In implont d’ennevar fix e l’illuminaziun da notg dueien garantir quei. Pertuccont Flond ha el menziunau che la vischnaunca reactivescha il project dalla casa da scola veglia. Ins vul investar 1,9 milliuns francs e scaffir quater habitaziuns attractivas d’affittar. A Cuort/Meierhof duei il project dil plaz cadruvi garascha sutterrana progredir. Sco tierz referent ha il guardiaselvaschina Gion Bundi la finala informau ils presents dallas zonas da ruaus da selvaschina che skiunzs e sportists d’unviern ston risguardar e respectar.(fmr/abc)