Frisal, Frisal – la reprisa d’in niev musical romontsch

La Val Frisal, in bischu dalla natira ch’ei situaus denter ils Cavistrai ed il Péz Durschin, survegn el niev musical veta humana. Gia avon 40 onns ha Armin Caduff fladau veta el funs dalla val e creau il vitg Frisal en in musical. Ussa va la historia dils da Frisal en ina nov’epoca. Ils vischins han profitau da buns temps da prosperitad, mo ussa ei igl indeci da conjunctura sbassaus. Els ston s’organisar da niev, ed igl ei da sminar – ei va buca senza impediments e schabetgs scurils.

La cumedia garantescha disvaris so­cials. Ils responsabels prendan las hottas enta maun. Senza experientscha e finamira van denton lur plans sco las cauras en tuttas direcziuns. Gie, las cauras giogan in’impurtonta rolla el giug. Il cavrer haveva trenau ellas cun exercezis militars. Ils avdons eran bein endisai dil profit dalla conjunctura aulta e vulan cuntinuar cun plans ell’aria. Ina casa d’opera duei garantir il success dil vargau.

Garantius ei il gudiment humoristic per ils aspectaturs. Primavera proxima ein las producziuns sil program (mira Fegl Ufficial dalla Surselva).

La lavur ei iniziada

Las emprovas digl ensemble La Compa­gnia Rossini, dil chor e dils affons ein iniziadas. Pli tard vegn vitier in pign orchester per cumpletar ils protagonists dalla scena. Igl ei in brav carr ch’ils ini­ziants ston trer e menar al success. La curascha persuenter han els priu digl em­prem musical «Docter per forza» digl onn 1975 ch’ei staus in grond success. Avon dus onns ha Armin Caduff cumponiu il niev musical. Sco adina tier sias cumposiziuns ha el fatg ei sco ils meisters da pli baul cun tschentar nota per nota sin las lingias dil fegl vit. Oz, el temps digital stat denton in gries cudisch cun las notaziuns stampadas enta maun al maestro. El temps da corona eis ei stau pusseivel da registrar il script dall’ovra, ina lavur che Claudio Simonet ha realisau. Sin fundament dalla partitura digitala survegn mintga register sias notas ed in extract da clavazin cuntegn cant ed accumpignament adattaus per las emprovas dils solist e dil chor.

La famiglia musicala da Danis

Cun Armin Caduff ei siu entir ensem­ble da La Compagnia Rossini integraus ella producziun dil musical. La direc­ziun musicala surpen il maestro sez, la reschia stat su a Flurin Caduff. Cun si’experientscha da tribuna ei el igl um adattau persuenter. Maria Catrina Albin-Caduff fa las emprovas cul chor dils affons. L’organisaziun dalla manifesta­ziun ei tier Lisabeth Caduff e Maria Catrina Albin-Caduff. Ivo Bärtsch e Christian Barenius cumpleteschan il team organisatoric per coreografia ed orchester. Annadora Friberg creescha costums e maletg da tribuna. L’ovra en nies lungatg romontsch ei in’ulteriura contribuziun d’Armin Caduff per la cultura indigena. Sco tier igl emprem musical ord sia plema spera el ch’il niev project anfli attenziun sur nos cunfins ora per confirmar la promoziun da nossa cultura en­tras il pievel romontsch.