S-chellà eir per rais e presidents da stadis

D’incuort ha il passlunghist Dario Cologna annunzchà ch’el as retira davo quist inviern dal sport da passlung professiunal. «No d’eiran vairamaing pronts fingià l’on passà pella nouva cha Dario schmetta davo l’olimpiada a Peking», disch Hans Conradin chi maina la Gruppa da zampuogns Val Müstair, sco cha l’organisaziun dals fans da Cologna as nomna hoz. «No nu faran forsa plü uschè gronds viadis sco in quists ultims ons, ma a Zuoz, Tavo, Toblach e Val di Fiemme giarana eir in avegnir a sustgnair l’equipa da passlung svizra.»

Grazcha a la medaglia da Treviso

Fundada es la gruppa dals fans da Dario Cologna gnüda da l’on 2007: Cur cha quel d’eira tuornà da Treviso cun üna medaglia vaiva dat a Müstair üna festa per el. Tanter ils preschaints d’eira eir Hans Conradin chi s-chellaiva cun üna plumpa pel passlunghist indigen. Quai ha plaschü a divers uschè bain chi han decis da fundar la gruppa da fans da Dario Cologna chi’s fa dudir a l’ur da las loipas cul s-chellöz da las plumpas (sportivas). «Scha no giain ad üna cuorsa schi eschna pel solit in ses fin ot persunas», disch el, «nos plü lung viadi vaina fat dal 2011, pellas Maestranzas mundialas eschna its in quatter fin ad Oslo.» Per far il viadi vaivna survgni il bus da l’Institut Otalpin a Ftan. In quel vaivna chargià plumpas e binderas.

Dovrà l’agüd dad Adriano Iseppi

Davo 21 uras suna rivats al böt in Norvegia: «A Holmenkollen vaina parcà nos bus e tut las plumpas.» Els sun its a dar intervistas a la Televisiun Svizra. Intant d’eira gnüda nanpro in quel lö chi vaivan parcà lur bus üna pruna polizia. «Chi riva là bainbod il rai da la Norvegia, hana dit, e cha’ls schurnalists e la glieud spettan ad el», as regorda Hans Conradin, «mo schi che faina cun nos bus?, ans vaina dumandats, no nu pudaivan simplamaing ir giò ed ir davent cun el.» Qua hana gnü l’idea da telefonar ad Adriano Iseppi. Quel es gnü pella clav dal bus ed in quel mumaint es rivà eir il rai: «No til vain salüdà cun nossas plumpas», cuntinuescha’l e disch cun ün surrier: «Uschè dastrusch ad ün rai nu füssna rivats sainza quellas.»

In cumpagnia culs vaschins da la Val di Fiemme

Chi hajan passantà desch dis da bellezza in Norvegia, disch Hans Conradin, «ils organisatuors da la cuorsa in Val di Fiemme vaivan miss sü ad Oslo üna gronda tenda.» Ils fans dal passlunghist rumantsch d’eiran suvent là: «Cun els as pudaiva discuorrer talian, ed ün pa talian sa pro no minchün.» Els da la gruppa cullas plumpas pudaivan entrar illa tenda sainza problems. «Be a Remo nu laivna laschar entrar», quinta’l e ria, «no vain declerà cha quai saja il bap da Dario Cologna, mo quai hana cret pür cur ch’el ha muossà seis pass.» Ils commembers da la gruppa han dat eir in otras occasiuns bleras risadas: «No vain adüna bler da rier, alch discapit capita adüna», manaja Hans Conradin. Inscunters cun persunas prominentas hana gnü eir in oters lös: «A Toblach p.ex. eschna gnüts fotografats insembel cun Frank-Walter Steinmeier, il Bundespräsident da la Germania. Cun tants bodyguards intuorn el d’eira da verer da na far movimaints massa svelts.» Per sia ultima stagiun giavüscha la Gruppa da zampuogns Val Müstair bler success a Dario Cologna, impustüt a Peking. «No da la gruppa nu saran da la partida», conclüda’l cun ün ulteriur surrier, «quai füss istess ün viadi ün pa bundant lung.»