Lirica e mument historic

Dumengia suentermiezgi ei ser Martin Fontana vegnius a Sa­gogn. El seigi selegraus da far quella prelecziun ella Foppa, haveva el getg anticipadamein. El ha prelegiu ord ses dus cudischs bilings «Zwischen den Flügeln der Zeit/Denter las alas dil temps» e «Stilles Leuchten/Scleridas bufatgas». Ina trentina da visitaders han dau suatientscha agl invit dalla pleiv evangelic-reformada. Els han astgau guder lirica tschaffonta ord la plema d’in plevon che tgira cun quitau e fin sentiment il lungatg. Quella baselgia pintga cun siu ambient genuin seigi fetg adattada per talas occurrenzas, han ins udiu dils presents. Avon che ser Martin ha prelegiu, sco intermezzo ed alla fin, han ils auditurs astgau esser perdetgas d’in mument historic: Giusep Tschuor ha sunau sill’orgla veglia da 1772 ch’ei gest returnada el liug oriund e Rica Maria Cathomen silla nova da 1957. Ins ha saviu seperschuader ch’ils dus instruments harmoniseschan perfetgamein. Ina ha il tun cauld, l’autra sedistingua cul tun modern pli freid. En cumbinaziun culla lirica eis ei stau in deletg cumplein. Gl’auditori ei staus fascinaus cun tgei dicziun ed empatia che gl’um dad 87 onns ha schau prender part da sia observaziuns e da siu contact culla natira. Mintgina e mintgin ha saviu far agens maletgs, in e scadin ha saviu seschar inspirar da detagls e patratgs. La prelecziun da Martin Fontana, en quei ambient, cun quell’atmosfera fina, schurmegiada e cumpleta, hagi fatg gronda impressiun, ha ina visitadra commentau alla fin dall’occurrenza. Ella ha aschuntau ch’ei duvrassi dapli tals muments e talas caschuns.(fmr/abc)