Pront d’augmentar las contribuziuns

Cun il conclus dals 2 da favrer 2021 concernent las propostas per promover las linguas en il chantun Grischun ha la regenza prendì enco­nuschientscha dal catalog da mesiras da l’october 2020. En quest connex è l’Uffizi per la scola populara ed il sport vegnì incumbensà da realisar la mesira «Promover scolas bilinguas e trilinguas sin il stgalim da la scola populara entaifer vischnancas plurilinguas e germanofonas.» Per quests motivs prevesa la regenza, cun la resalva ch’il Cussegl grond approveschia il preventiv, da budgetar e da pajar a partir da l’onn 2023 puspè las contribuziuns pauschalas maximalas da 400 francs respectivamain da 500 francs als purtaders da scola cun scolas e classas bilinguas. Quai chaschuna custs supplementars da var 200 000 francs per onn envers il preventiv 2022 ed envers il plan da finanzas 2023–2025. Quai scriva la regenza en sia resposta sin ina incumbensa dal deputà Patrik Degiacomi (PS, Cuira).

Contribuziuns limitadas

Partik Degiacomi aveva fatg attent a l’Ordinaziun da linguas dal chantun Grischun che prevesia bain contribuziuns pauschalas per scolara u scolar als custs per installar e per manar classas u scolas bilinguas. Questas contribuziuns sajan dentant limitadas en il preventiv ad in import maximal da 330 000 francs. Quai vul dir: «Pli blers uffants che nizzegian las purschidas, e pli fitg che las contribuziuns per scolara u scolar sa reduceschan.» Las contribuziuns importian perquai mo var 250 francs, pia cleramain damain ch’ils 400 francs per scolara u scolar. Degiacomi e vinavant da l’avis ch’i saja difficil d’installar e da manar classas bilinguas, sche la cofinanziaziun dal chantun na saja betg clera. En la resposta menziuna la regenza che la contribuziun pauschala na saja strusch sa midada dapi intgins onns da scola, perquai ch’il dumber da scolaras e scolars saja relativamain stabil. Uschia na chapeschia la regenza betg, pertge che las pitschnas differenzas duaian chaschunar difficultads per ils purtaders da scola pertutgads. (fmr/ac)