Chandailas pel temp d’Advent

Il trar chandailas es ün’üsanza chi ha lö per regla avant il temp d’Advent. Las chandailas trattas svess survegnan lura üna plazza bel ed aposta per preschantar cun ün pa baja.

A Sent s’han radunats sonda passada sülla plazza immez cumün, pro’l Bügl da Plaz, creschüts ed üna pruna d’uffants per trar lur chandailas. Ils organisatuors vaivan preparà diversas troclas cun tschaira in plüssas culuors ed ils pavagls chi fuorman la basa per trar chandailas. «Organisà vain l’evenimaint da la gruppa da gö da Sent, üna società cun var dudesch mammas chi fan part a la gruppa. La quantità da mammas dependa eir da quants uffants chi sun in quell’età,» ha declerà Natalia Roner. L’evenimaint d’eira cumbinà cun üna pitschna restoraziun, cun raclette e dabaiver. Da la partida sun stats uffants fich pitschens ed eir plü gronds chi d’eiran fatschendats cun ögls glüschaints e cun grond fatschögn.

Ün pavagl e tschaira

Las organisaturas vaivan preparà dasper il bügl plüssas troclas cun tschaira choda e vaivan cuernà la via fin pro’l bügl per impedir cha tuot la plazza saja a la fin plaina cun guots e rests da tschaira. Ils uffants bognaivan nempe lur pavagl illa trocla cun lur culur preferida e giaivan lura via pro’l bügl per sfraidir tuot. Quista procedura han els fat fin cha la chandaila vaiva la fuorma preferida. Ün purtret da bellezza per verer cun che seriusità cha’ls uffants d’eiran fatschendats.

L’üsanza es fich veglia ed es però eir hoz amo dumandada. Ils uffants plü gronds han trat lur chandaila sainza agüd dals genituors ed ils plü pitschens sun gnüts assistits da bap o da mamma. Uschè giodan ils uffants il temp da l’aspettativa da las quatter dumengias d’Advent cun lur aigna chandaila.