Teater, film e musica pil giubileum dalla Ligia grischa

«Sut igl Ischi 2024». Aschia senumna il project dalla fiasta centenara dalla Ligia grischa a Trun. Il concept per quei arranschament commemorativ ei vegnius preparaus ils davos meins d’ina gruppa da lavur installada dalla vischnaunca per quei intent. Avon rodund treis jamnas ha la gruppa suttamess sia lavur alla suprastonza communala e lezza presenta il concept questa sera al parlament.

Concept fetg concret

La gruppa da lavur cul president communal Dumeni Tomaschett, la vicepresidenta communala Erica Cavegn-Pfister sco era Esther Berther, Magnus Manetsch e Clau Scherrer propona ina fiasta cun plirs elements ed arranschaments reparti dalla primavera entochen la stad 2024. En special setracta ei d’ina turnea da concerts dil Chor Ligia Grischa, in teater el liber ed ina producziun da concert cun film. La retscha da concerts cul tetel «La Ligia grischa sin viadi historic» duei vegnir purschida en tschun loghens d’impurtonza per la Ligia grischa. Sper il Chor Ligia Grischa duein ulteriuras formaziuns separticipar al concert. Buca muncar dueien el program las canzuns «A Trun sut igl Ischi» e «La Ligia Grischa».

Film e teater

In ulteriur element dil concept ei in film davart la Ligia grischa, denter auter duei vegnir raquintau la historia digl Ischi. La presentaziun da quei film duei allura vegnir cumbinada cun cant e musica. Denter auter duein ins udir parts originalas dil giug festiv «Trunser Festspiel», il toc cumponius da Duri Sialm per la fiasta centenara dalla Ligia grischa 1924. In tierz element essenzial dalla fiasta da 2024 duei in teater el liber esser. Las acturas ed ils acturs duein esser da Trun ni dalla regiun. Trun ha gie enconuschentamein ina biala tradiziun da teater e quella duei renescher en quei connex. Il cuntegn duei dar in maletg imaginativ da Trun cun elements destruents, conflicts mo lu era nova speronza. Ei duei esser in toc popular cun ina tematica curaschusa, mo era divertenta. Plinavon preveda il concept era in film sco document da regurdientscha davart las preparativas da quella fiasta centenara. El duei mussar denter auter tgei che capeta davosas las culissas.

Mo cun sustegn dalla vischnaunca

El concept che vegn en discussiun questa sera ella seduta dil cussegl da vischnaunca fa la gruppa da lavur era propostas co cuntinuar aschilunsch che la vischnaunca dat glisch verda alla finanziaziun. Aschia eis ella dil meini d’installar in comite d’organisaziun ed in meinaproject. Quei gremi duei allura surdar las empremas incumbensas concretas sin fundament dils contacts ch’ein gia empusti. Las decisiuns duein vegnir pridas en entelgientscha culla suprastonza communala. Il project preveda expensas totalas da 873 000 francs. La gruppa da lavur quenta cun entradas da 373 000 francs, da quei rodund 200 000 francs en fuorma da sustegns da sponsoring. Aschia vonza da principi ina summa da 500 000 francs che duess vegnir cuvretga dalla vischnaunca.

Credit brut da 873 000 francs

«Questa sera decida il cussegl da vischnaunca davart il credit brut da 873 000 francs. Sin fundament dalla calculaziun dallas expensas e las entradas fatga dalla gruppa da lavur vegn la vischnaunca a stuer purtar ina summa da maximum 500 000 francs. Nus quintein denton ch’ei reusseschi aunc da recaltgar ulteriurs mieds finanzials, aschia che la summa finala per la vischnaunca duess strusch esser aschi aulta», di il president communal Dumeni Tomaschett. Accepta il parlament la proposta – quei che Dumeni Tomaschett spera – vegn la radunonza communala a decider davart il credit aunc quest atun. Cugl Uffeci da vischnauncas dil cantun seigien ins secunvegnius aschia da far reservas persuenter els proxims quens: «El preventiv per 2022 che vegn era tractaus questa sera havein nus gia fixau ina summa persuenter.»

Daners per saver entscheiver

«Sche nus lein far quella fiasta lu drova ei daners per saver instradar ladinamein ils proxims pass. Las preparativas per las cumposiziuns sco era il cuntegn dil teater ed il film ston entscheiver il proxim temps per esser a fin ad uras», puntuescha Dumeni Tomaschett ch’ei dil meini che quella caschun da giubileum astgi buca vegnir munchentada ord vesta dalla vischnaunca da Trun. Cul concept sco tal ei Dumeni Tomaschett cuntents: «Nus lein buca far ina fiasta sco avon 100 onns. Quella cheu duei buca dar in sguard mo el vargau, mobein era tractar il temps hodiern ed igl avegnir. En quei senn duei ei esser enzatgei modern e conform al temps.»