«Ena golp totga aint angal cun gants»

«La tgatscha bassa è ensatge tot oter tgi la tgatscha ota. Tar la tgatscha bassa vogl per me an amprema lengia betg pigl mies success da sagettar en animal mabagn per la collaboraziun tranter me ed igl mies tgang Mac Donald. Schi el vign da lavantar e catscher la glioir ed ia pòss alloura sagettar ella è alla fegn finala per me igl pi grond plascheir igl success tg’igl mies tgang ò gia», rachinta Enrico Netzer agl discurs cun la FMR.

Tot onn a tgatscha

Aint igl cantun Grischun èn igls deis da tgatscha limitos. An otras teras scu la Tschecheia ni la Germania è chegl pero oter. Uscheia tg’igl catscheder passiuno vo sur onn a tgatscha. «An Tera tudestga plai a me tgi te ist en tant pi liber. Te ast betg chel squitsch tge è lubia e tge betg. Igl è defino tge animal tgi pò neir sagetto durant tge meis. Las leschas èn pi loccas e te ast daple taimp dad observar e selecziunar igls animals. Egn cun ena bunga genetica sagettast forsa betg immediat ed igl laschast igl amprem sa multiplitgier tgi chels bungs gens geian anavant ed igl sagettast alloura pir en per onns pi tard», daclera Enrico Netzer.

«Räuber- Beute» curva

«Ia vign a tgatscha per pruar da tigneir constant igl domber dallas golps e dallas glioirs, uscheia tg’igl equiliber seia garantia», rachinta Enrico Netzer. I detta schon blera gliout tgi seia critica anvers la tgatscha bassa e la tgatscha da liagier. «Tscherts creian tgi te ast simplamaintg plascheir da mazzar animals ed a me è er schon nia clamo siva tg’ia seia en morder», dei Enrico Netzer.  Ma agl gioven catscheder vogl per bler daple tgi da mazzar. La golp è ancunaschainta per surpurtar malsognas. Schi vign sagetto mengia pacas glioirs on las golps blera preda ed i dat veaple golps. Igl domber dallas glioirs vo anavos e per regular puspe chel domber ot dallas regulescha la nateira chegl cun ena malsogna. «Las golps son alloura surpurtar chellas malsognas sen animals da tgesa e perfign segl carstgang» daclera Enrico Netzer. Schi las golps e glioirs vivessan gliunsch davent digl carstgang fissigl er nign problem da lascher regular chegl la nateira. Ma las golps vignan fitg manevlas allas vischnancas ed igl carstgang aintra adegna pi fitg ainten la nateira. Tranter oter sa nutreschan las golps da compost tgi sa catta savens gist dasper las tgesas. La nateira faschess tot sainza igl carstgang. Igl carstgang è pero dependent dalla nateira e digl gôt. «Te vast a tgatscha per tigneir igl domber giustifitgibel betg tgi la nateira stò regular. La nateira è numnadamaintg bruatala e derasa malsognas scu grouscha, morva, «Fuchsbandwurm», pesta da glioirs etc. Per tgi chegl capeta betg schi tgunsch vigna a tgatscha – per gidar regular igl domber da selvaschigna.»

Pruar da duvrar igl antier animal

Da tgatscha bassa sagetta Enrico Netzer principalmaintg glioirs e tes. Igls tes vignan numnadamaintg scu las golps ainten las vischnancas e fon disurden e donns. Or dallas glioirs fò el tranter oter salsiz e cugl grass digl tes fò el danovamaintg sez en itg tg’el nomna „Enrico’s Dachsfett“. Las pels dallas golps venda el alla fiera da pels. «Avant en per onns vaia anc survagnia 20.- per ena pel, oz angal ple 3.- En problem è tgi blera gliout so betg disfranztger tranter pels da schinumnadas “Pelzfarms” agl exteriour noua tgi golps vignan angarschedas e mazzadas a moda brutala e golps tg’on vivia an Surses an libertad ed on gia ena curta mort. Per me ègl an mintga cass giustifitgia eticamaintg da duvrar la pel d’ena golp scu gio igls noss pardavants on fatg,» dei Enrico Netzer anvers la FMR.

Legendas:

Fotos mad

Foto 1: A liagier la golp vo Enrico Netzer segl madem post scu gio sies bab geva.

Foto 2: Oz vala ena pel d’ena golp strousch daple tgi 3 francs.

Foto 3: Igl catscheder passiuno Enrico Netzer da Savognin sesent a Farrera (Schons).

Foto 4: “Enrico’s Dachsfett” tgi geida cunter inflammaziuns, fardura e dolours dallas giuadeiras.