«Uossa es da metter tuot sün üna carta»

L’emischiun «Die Höhle der Löwen» tratta da giuvens start-ups chi haun l’occasiun da preschanter lur idejas a tschinch giurors. La giuria, ils liuns, consista dad investuors, chi haun d’üraunt lur carriera realiso simils progets e fundo egnas dittas. Il böt da las partecipantas e dals partecipants es da persvader als giuruors da lur idejas e da survgnir ün’investiziun in barat cun üna procentuela da la ditta. Sper l’agüd finanziel vegn eir l’experienza professiunela e la rait da contacts da bun als start-ups.

Ün paquet cumplet

Ma che es vairamaing l’ideja d’affer da «Feey»? «Nus essans da l’avis cha plauntas nu sun gnidas vendidas güst fin uossa. Scha’s fo il conguel cun glieud chi ho ün chaun u ün giat, es que normel cha’s ho ün docter u ün veterinari. Ma tar plauntas d’eira que scu listess. Üna vouta ch’ellas staun mel, as lascha murir ellas e’s bütta davent », declera Severin Candrian.

Ils cliaints nu paun be cler oura e puster plauntas our d’ün vast sortimaint, els paun eir profiter da la cussagliaziun e dal savair dal docter da plauntas. A quel as po drizzer e dumander cussagl, scha las plauntas nu staun uschè bain tar ün a chesa. E que üna vita intera. Tres il servezzan dal docter da plauntas vain que pussibel da tegner plauntas eir sainza polesch verd. Uschè as declera eir il motto da la ditta, nempe «plauntas per tuot las culuors dal polesch». Impü vegnan tramissas las plauntas in üna terra speciela d’ota qualited ed in ün pot da fluors, uschè cha nu’s stu pü fer grand da giardinier. Üna chartina persunela scritta a maun ed infurmaziuns scu cha’s cultivescha il meglder la plaunta cumplettan il paquet.

Cumanzo vaiva tuot be scu hobi

Severin Candrian es nat dal 1992 ed es creschieu sü a Zuoz. Cun ün giarsunedi scu poligraf e cun la matura da professiun in tas-cha s’ho’l miss in viedi vers la Bassa ed ho stübgio «interaction design» alla ZHDK (Zürcher Hochschule der Künste). Zieva il stüdi ho’l lavuro duos ans scu «productdesigner» in üna ditta specialiseda sün design da web ed app a Turich. Lo ho’l eir imprais a cusgnuoscher ün dals partenaris futurs tar «Feey».

«Il grand problem es, cha bgera glieud craja cha plauntas d’chesa mouran simplamaing, listess che cha’s fo. Ed uschè ans es eir gnida l’ideja da’ns specialiser cun nos proget sün quist problem», s’algorda Severin Candrian.

Düraunt il di haun els lavuro inavaunt illa ditta a Turich, la saira ed i’l temp liber haune cumanzo a fabricher sü «Feey». Svelt als es que gnieu cler cha lur ideja hegia potenziel ed in avrigl 2020, düraunt il prüm lockdown, ho lur proget piglio üna fuorma, ch’els vaivan da dir: «Hai, que es ün pô dapü scu be ün hobi. Uossa es da metter tuot sün üna carta e da pruver a chatter oura, quaunt grand cha’l potenziel da noss’ideja es.» Els haun tuots duos do aint la desditta e s’haun pudieu concentrer cumplettamaing sün «Feey».

In tschercha d’investuors

Zieva lur success iniziel haune svelt bado cha que es greiv da pudair crescher. «Scha s’ho üna tscherta grandezza scu ditta, es que greiv da crescher culs egens raps. Scha’s drouva tuot ils raps cha’s guadagna be per sustgnair la ditta e na per crescher, alura nu’s vegn our d’ün fat», declera Severin Candrian.

Tres cuntschaints sun els gnieus motivos da’s parteciper a l’emischiun «Die Höhle der Löwen». Ils avantags da fer reclama e da gnir ad imprender a cugnuoscher ils investuors cun lur experienza e rait da contacts d’eiran buns motivs da piglier part. Ma impustüt nu vaivane da perder ünguotta ed uschè s’haune lascho aint sün quist’aventüra.

Nouv record d’investiziun

Ils fundatuors nu vessan fat il quint cun ün tel success ill’emischiun. L’ideja d’eira da clapper ün’investiziun da 100 000. francs per 5% da la ditta. Düraunt lur preschantaziun haun els però pudieu persvader la giuria in tela maniera, ch’els haun arrandscho a la fin üna cunvegna da 1,2 milliuns francs per 30% da la ditta. Ün nouv record ill’istorgia da l’ediziun svizra da «Die Höhle der Löwen»!

Tres quist success as haune pudieu spargner bger temp e forzas. Severin Candrian managia : «Da chatter persunas chi investeschan ün milliun u ün milliun e mez düra ün pêr mais. In quella fasa cha nossa ditta as rechatta pel mumaint sun ün pêr mais bger temp. Cha pudaivans realiser quist böt in ün di ans ho spargno bgeras resursas.»

Ils raps cha la giuria ho investo in «Feey» vegnan per la granda part druvos pel marketing, per gnir pü cuntschaints in Svizra ed expander in Germania. Il shop online in Germania vess dad avrir in december u schner. «Ma que es pel mumaint la granda sfida cun la bürocrazia tudas-scha», disch Severin Candrian.