Trun: Unanim pil credit per la fiasta da «600 onns Ligia grischa»

Il cussegl da vischnaunca da Trun ha acceptau unanimamein il gliendisdis sera la damonda dalla suprastonza communala per in credit brut da 873 000 francs per la fiasta centenara «600 onns Ligia grischa» igl onn 2024. Il parlament autorisescha la gruppa da lavur da realisar il concept e preventiv en concordanza culla suprastonza communala. La decisiun finala davart quei credit pren la radunonza communala igl emprem da december 2021. Tenor il concept elavurau dalla gruppa da lavur eis ei previu da festivar quei tierm sut il tetel «Sut igl Ischi 2024». Previ ein arranschaments cun concerts, teater e film. Medemamein duein las preparativas per quella fiasta vegnir documentadas en fuorma d’in film.

Senza cuntervuschs ha il cussegl da vischnaunca era approbau il preventiv dalla vischnaunca pigl onn vegnent. Il quen da gudogn e sperdita preveda ina sviulta da pressapauc 7,6 milliuns francs cun in deficit da strusch 150 000 francs. Il preventiv dil quen d’investiziuns quenta cun expensas da 3,6 milliuns francs ed entradas da 1,8 milliuns francs. Las investiziuns principalas previdas 2022 pertuccan projects da vias. Sin proposta dalla suprastonza communala e dalla cumissiun da gestiun decida il cussegl da vischnaunca da laschar il pei da taglia sin 105 pertschien dalla taglia cantunala sempla.

Il cussegl da vischnaunca da Trun ha eligiu siu biro pigl onn 2022. President da quel ei Mario Lechmann, vicepresidenta Flurina Bundi.