Igls mafiosis da Sur

Marde passo ò igl Uffezi federal da giustia arresto an Svizra seis burghes taliangs, dus aint igl Grischun. A chels ranfatschan las autoritads commerzi cun drogas e criminalitad organisada. L’Italgia ò gia dumando la Svizra per surdar igls arrestos, chegl sen basa d’en cumond d’arrest dalla Procura publica da Milang, chegl communitgescha la Procura publica federala. Ainten en’acta da tgisa dalla Procura publica da Milang cumparan perfign treis burghes taliangs domiciliias a Sur. La mafia an Surmeir?

54 tgisos

Igl è sto en de istoric per cumbatter la mafia: sper igls seis arrestos an Svizra è reuschia marde passo er an Italgia d’arrestar varsaquantas persungas suspectadas an connex cun ambrogls da mafia. Tenor las autoritads sa tractigl da passa 100 commembers dalla ’Ndrangheta, ella vala scu egna dallas grondas actouras aint igl commerzi internaziunal da drogas. L’acta da tgisa da var 1 400 paginas tradescha tgi sa tracta da 54 tgisos, agls quals vign ranfatschea tranter oter criminalitad organisada, commerzi cun drogas e corrupziun.

Protocols d’observaziun

La FMR ò piglia invista ainten l’acta da tgisa dalla Procura publica da Milang tgi datescha digls 26 d’otgover 2021. L’acta cuntigna varsaquants protocols d’observaziun dallas autoritads taliangas. Ainten en protocol cumparan treis burghes taliangs. Chels na totgan betg tigls 54 tgisos, èn pero stos preschaints ad ena scuntrada igl aton 2020 an Italgia ed èn stos domiciliias da lez taimp a Sur an Surses. Els abitavan ainten ena tgesa tgi dat albiert a luvrants da construcziun.

«Flotta gliout»

Valerian Signorell è proprietari da chel alloschi pigls luvrants a Sur. En’interpresa da construcziun indigena fò adiever dalla tala. Tenor el on igls burghes taliangs abito igl onn passo a Sur. «Cura tg’els èn stos cò vaia betg m’accurschia, tg’els fissan sa participos ad activitads illegalas. Chegl è stada flotta gliout. Pir pi tard, an raschieni cun ameis, sunga nia a saveir, tgi on gia apparentamaintg contacts cun la mafia, egn veva creia schizont da seser giu en castei», rachinta Valerian Signorell. Noua tg’igls treis omens èn ossa, na so el betg. «Sch’ia vess m’accurschia igl onn passo, tg’els fon ensatge illegal, vessa perfranc piglia l’iniziativa ed agea», accentuescha Valerian Signorell.

Nigns detagls

Tenor l’acta da tgisa èn quatter digls 54 tgisos stos preschaints alla scuntrada igl aton 2020. Tar ena persunga suspectada principala sa tractigl schizont digl frar dad egn digls omens tgi stava igl onn passo a Sur. Tge connex on pomai igls treis omens da Sur cun la mafia talianga? Sa tractigl tigls dus arrestos da marde passo aint igl Grischun, schizont da dus omens tgi stavan igl onn passo anc a Sur? Sen dumonda dalla FMR n’ò ni la Procura publica grischuna, ni igl Uffezi federal da gisteia ni la Procura publica federala lia infurmar pi detaglea davart l’identitad digls dus arrestos.

La mafia aint igl Grischun

Berina Repesa digl Uffezi federal da pulizeia (fedpol) ò confirmo anvers la FMR, tgi la mafia seia activa ainten l’antiera Svizra, uscheia er aint igl Grischun. «La carta geida per s’orientar (varda carta). Pero igls singuls puncts stattan summaricamaintg per ena regiun. Igls puncts baseschan sen infurmaziuns da retschertgas ni process pendents. Er igl barat cun la pulizeia d’oters paeis inditgescha, an tge regiuns tgi la mafia è activa», dei Berina Repesa. La carta digl fedpol mossa tranter oter en punct ainten la Surselva, aint igl Mesoc ed ainten la cuntrada da Tavo. Agl mastral da Surses Leo Thomann n’è dantant betg ancunaschaint en connex tranter igls dus arrestos da marde passo e la fracziun da Sur: «Per me è chegl igl pi nov», ò el detg sen dumonda dalla FMR. Uscheia restan igls treis omens da Sur per antant igl misteri mafious da Surses. Fatg è, tg’els cumparan ainten l’acta da tgisa da Milang e tgiravan tenor lezza contacts cun varsaquants tgisos principals.