Il tip: Tgi era Frida Kahlo?

Jau vom gugent en museums u exposiziuns. Jau na vuless dentant betg mo guardar las ovras d’art, mabain era vegnir a savair insatge da l’artist. Perquai m’infurmesch jau per il solit ordavant. Adina na va quai però betg – la visita è lura adina in pau stentusa.

Cler – a la cassa datti adina in carnettin u fegl cun las infurmaziuns giavischadas. Ma sche jau hai adina da leger suenter, na vegn jau betg propi da ma concentrar sin ils purtrets. Audioguides èn ina super chaussa, ma igl è da chattar la dretga lingua e suenter far adatg da sa chattar en il gist lieu cura che la vusch declera tge ch’ins vesa gist – damai, era betg propi il hit per in pèr uras patgificas en il museum.

En la Lichthalle Maag a Turitg datti ussa però in’exposiziun nua ch’i na fa betg basegn ni da s’infurmar ordavant, ni da sa dispitar cun in carnettin u cun in audioguide. L’unic ch’ins sto far è, da tschertgar ina plazza patgifica per sa tschentar. En ina installa-ziun cun projecziun da video, tun e glisch quinta l’artista u l’artist – u almain la vusch che pretenda dad esser l’artist u l’artista – gist sez/za sia istorgia. Vi da la paraid, il tschiel sura e cubus amez la halla vegnan projectadas sias ovras.

Il tscharvè è il cumenzament da l’installaziun, che dura circa 20 minutas, in pau surdumandà cun uschè bleras impressiuns, el s’endisa però spert vi da l’explosiun audiovisuala enturn il public.

L’exposiziun actuala è deditgada a l’artista mexicana Frida Kahlo (1907–1954). Quels che sa dumondan ussa: «Tgi era Frida Kahlo?» Apunta – quai vegnis vus a savair en l’exposiziun «Viva Frida Kahlo – Immersive Experience» che dura anc fin ils 2 da schaner 2022. Infurmaziuns datti sut www.lichthallemaag.ch.