Capricorn 3133: Design spezial per il giubileum

La gievgia suentermezdi ha la Viafier retica (VR) obtegnì il 500. vagun ch’è vegnì fabritgà dapi 1960 ad Altenrhein. Vegnì furnì è el cun il tren ad autotracziun Capricorn 3133 che aveva in design da «Schampagn» per quest giubileum. Quest tren da Capricorn è l’emprim che porscha gratuitamain WLAN als passagiers. El porta il num «Piz Palü».

Sco quai che la VR scriva en ina communicaziun als meds da massa, curra il mument la pli gronda cumpra da material rudlant en l’istorgia da la VR. 56 trens ad autotracziun da Capricorn vegnan a cursar en l’avegnir sin la rait da la VR. Cun els modernisescha la viafier essenzialmain si’infrastructura. Tenor la viafier san ils trens vegnir mess en funcziun tenor plan. Oz vegnan ils trens furnids da Stalder, pli baud eran quai autras interpresas. Sco quai ch’il directur da la VR, Renato Fasciati, ha accentuà a la preschentaziun da quest vagun da giubileum, vegnan tuts trens da Capricorn a disponer en l’avegnir da WLAN gratuit per ils passagiers. Ils trens che na disponan anc betg da quest servetsch vegnan anc cumplettads. Dals 56 trens da Capricorn empustads èn il mument 24 en funcziun tar la VR. 21 curseschan tenor urari. L’onn proxim èn ils trens moderns sin binari surtut sin ils tschancuns da Landquart–Tavau–Filisur e Landquart–S. Murezzan.