Marchà d’Advent tradiziunal
Il marchà d’Advent a Scuol ha tradiziun e vain organisà fingià daspö s-chars 40 ons. La plazza da Plaz es ün lö predestinà a Scuol Suot per ün tal evenimaint.
Tanter las bellas chasas engiadinaisas giò’n Plaz vaivan ils exponents preschantà in sonda passada üna bella schelta da prodots da tuot gener. Tanter oter eir chandailas, dutscharias e pappas chi invidan a far las cumischiuns pel temp d’Advent. Tuot la plazza d’eira iglüminada cullas guirlandas da glüm ed ils stands cun glüminas e chandailas. Il marchà d’eira bain visità ed ha eir sport la pussibiltà d’inscuntrar glieud cuntschainta chi nu’s vaiva vis fingià da lönch innan plü – ün inscunter tanter giasts ed indigens, tanter giuven e vegl. La savur da vin chod e punsch, grassins e dutscharias dominaivan l’arrandschamaint tradiziunal. Il marchà es gnü organisà da Christina Truog (presidenta) e da Martina Sem (chaschiera). Per la restoraziun sün plazza d’eiran respunsablas las damas da la squadra dal Club da hockey Engiadina da Scuol.
L’evenimaint ha tradiziun
Il marchà d’Advent ha lö daspö s-chars 40 ons e gniva organisà plü bod sül stradun pro’l Center Augustin a Scuol. Là gniva quel disturbà dal trafic dad autos e nu vaiva quella taimpra d’Advent giavüschada. Avant var 20 ons han ils organisatuors fat la dumonda al cumün, scha’l marchà nu pudess gnir fat a Scuol Sot giò’n Plaz. Il cumün ha subit sport man a la bun’idea e daspö là ha il marchà lö tanter las bellas chasas engiadinaisas sülla plazza cun salaschada. La culissa es impreschiunanta e dà al marchà üna taimpra particulara.
Gust da leger dapli?