Nagina universiada d’enviern 2021

La 30avla universiada d’enviern previsa dals 11 enfin ils 21 da december 2021 en plirs lieus da la Svizra Centrala ed il chantun Grischun n’ha betg lieu. Il motiv persuenter è il svilup fitg dinamic da la pandemia e las restricziuns d’entrada en Svizra cumbinadas cun quella. L’universiada è il pli grond arranschament da sport da studentas e students da l’entir mund. «Nus essan fitg trists da quella situaziun. Fitg gugent avessan nus beneventà las atletas ed ils atlets tar nus. Blers èn sa preparads fitg intensiv sin questas concurrenzas internaziunalas», di il president dal comite d’organisaziun, Guido Graf.

Il motiv principal che l’universiada na po betg haver lieu è la varianta dal virus Omikron. Da l’Organisaziun mundiala da la sanadad (OMS) vegn quella taxada per inquietanta. Per impedir ina derasaziun da quest virus ha la Confederaziun relaschà restricziuns d’entrada per persunas da differents pajais. Plirs pajais èn schizunt sin la glista da quarantina. «Sin fundament da questa situaziun na po l’universiada d’enviern 2021 betg avair lieu», scrivan ils organisaturs. Ils davos onns han quels prestà gronda lavur per possibilitar quest arranschament internaziunal. «A nus fa i mal il cor che nos atlets na pon betg sa mesirar avant agen publicum. Cun 126 atletas ed atlets fiss la Svizra stada la pli gronda delegaziun», di Christoph Böcklin, cau da la delegaziun dal team svizzer.