Sumvitg: Il preventiv dalla vischnaunca quenta cun in surpli d’entradas

Miez december salva la vischnaunca da Sumvitg la radunonza communala che tracta il preventiv 2022. Sper quella fatschenta principala sefatschentan vischinas e vischin d’in tschuppel autras tractandas. El rom d’ina revisiun parziala dalla planisaziun locala vegnan determinai ils spazis d’aua, zonas da prighel, zona da protecziun per l’aua sutterrana ed il plan general d’avertura traffic. Plinavon vegn suttamess al suveran la revisiun dil reglament da traffic sco era ils novs statuts dall’Uniun Nordic Surselva. Medemamein vegnan ils delegai per quell’uniun tscharni quella sera. Pil remplazzament dallas finiastras en casa da scola a Surrein presenta la suprastonza communala in project e la damonda da credit da 185 000 francs.

Grondas investiziuns Il preventiv dalla vischnaunca per 2022 quenta cun ina sviulta da pressapauc 7,8 milliuns francs. Aschilunsch che las prognosas finanzialas severificheschan havess il quen da serrar cun in avanzament da rodund 125 000 francs. Il quen d’investiziuns preveda expensas da 6,65 milliuns francs ed entradas da 2,86 milliuns francs. Aschia preveda la vischnaunca da midar stanzas da scola ella casa da scola a Sumvitg en habitaziuns. Persuenter ei previu 985 000 francs. Per la senda a Crappa Grossa che vegn adina puspei donnegiada da bovas ei reservau ina summa da 145 000 francs. Biebein 1,5 milliuns francs preveda la vischnaunca da Sumvitg d’investar el provediment d’aua. En quei connex setracta ei dalla sanaziun dils aquaducts da Rabius, Surrein e Laus. 690 000 francs ein reservai el preventiv 2022 pil project Lag Salischinas e pil project d’ina ovra hidraulica Sumvitg/Cumpadials ein 1,75 milliuns francs indicai el preventiv. La radunonza communala ha liug mesjamna, ils 15 da december 2021 a Sumvitg.