La polenta

Tut la Svizra e tut las medias pussaivlas en il pajais han gia ludà la seria. E la mesadad da la Svizra ha gia guardà quella. Ed ussa vegn er anc la FMR e dat il tip da guardar «Tschugger», la nova seria da cult dad SRF. Gea­bain, el vegn tard, quest tip! Però i vala la paina! Perquai che la seria «Tschugger» pudess era esser in exempel per il mund rumantsch.

Per tge vai insumma? Ina truppa da giuvens Vallesans – en­turn il chau creativ David Con­stantin (surnum: Bax) – aveva creà gia avant diesch onns per «20 Minuten» ina seria web cun il num «Tschutter». I gieva a prima vista per ballape, per far carriera e per blers raps cun transfers da ballapedists. Il resultat da la seria: in caos plain trash, nuncorrectezza politica e cun comica en dialect vallesan, cun protagonists che stgarpitschan sur las atgnas peniblezzas. Simplamain risadas!

Ed ussa ha questa truppa en­turn David Constantin fatg il proxim pass, da «Tschutter» a «Tschugger», in surnum per in policist en dialect vallesan. Quasi sco sche nus Rumantschas e Rumantschs schessan a la polizia «la polenta». La seria «Tschugger» vegn emessa dapi ils 28 da november la dumengia saira avant las 22.00 sin SRF1. L’entira seria cun tuttas tschintg episodas è dentant da vesair gia online sin las plattafurmas da l’emettur. L’em­prima episoda han guardà passa 400 000 aspectaturas ed aspectaturs. In success enorm.

E tge po il mund rumantsch emprender da questa seria vallesana? – David Constantin e sia glieud cumprovan ch’i n’è betg da star mal u da dar si las atgnadads, ils clichés ed in iper-regiunalissem per pudair realisar ina buna seria e cuntanscher in bel public. Mabain ch’i vala la paina da restar fidaivel a quellas atgnadads, da las caricar, ironisar e sviluppar vinavant.

Dal rest, la segunda stafla da «Tschugger» è gia filmada e vegn emessa previsiblamain en il decurs dal 2022.