«Lavur voluntara è gratuita, ma custaivla»
Persistenza, innovaziun e colliaziun
L’organisaziun Benevol dal Grischun ha surdà per la settavla giada il Prix Benevol Grischun, quel dal 2021 a la Fondazione Ente Museo Poschiavino. Ultra da quai han l’Uniun FamilienRat da Tavau e l’Uniun Informatica per l’Africa survegnì in premi da renconuschientscha. La surdada dals premis è vegnida embellida dal Chor da dunnas Chursüd.
Il Prix Benevol Grischun vegn surdà ina giada per onn ad uniuns, gruppas, projects ni era instituziuns che fan lavur voluntara. Dal 2021 han 19 furmaziuns candidà per il premi Benevol. Il president dal cussegl da fundaziun Benevol Grischun, Markus Feltscher, ha ditg en ses bainvegnì, ch’el saja fitg surstà che 90 persunas sajan malgrà la situaziun dal coronavirus, vegnidas per assister a la surdada dal premi. La valur da la lavur voluntara haja sa midada el senn positiv, ha Feltscher constatà. «En l’entira Svizra vegni prestà ozendi medem blera lavur voluntara aifer in onn, sco quai ch’i vegn lavurà en il sectur da construcziun.» La giuria haja sa fatschentada intensivamain cun tuttas candidaturas avant che selecziunar. Sut il stritg sajan tut las candidaturas in bel mussament che er la lavur voluntara en Grischun vivia, «gea prosperescha perfin en tscherts secturs».
La giuria che ha premià tenor ils criteris innovaziun, colliaziun e persistenza ha decidì da surdar il premi principal a la Fondazione Ente Museo Poschiavino sco instituziun regiunala cun in concept persistent che ha apparentamain persvas fitg. 50 persunas voluntaras lavuran per las exposiziuns en il museum. La Fondazione Ente Museo Poschiavino è vegnida fundada l’onn 1950 da la Pro Grigioni Italiano. Il museum collavura fermamain cun autras instituziuns culturalas da la regiun.
In dals premis da renconuschientscha ha survegnì l’Uniun Informatica per l’Africa. Quell’uniun ch’è domiciliada en la Val dal Rain grischuna s’engascha dapi 15 onns per transportar ed installar infrastructuras d’informatica che na vegnan betg pli duvradas en Svizra en differents pajais da l’Africa. L’uniun dat er curs als applitgaders e mussa co duvrar ils computers. Il premi è vegnì surdà per l’idea innovativa. Il segund premi da renconuschientscha ha l’Uniun FamilienRat da Tavau obtegnì. La finamira da quella uniun ch’è vegnida fundada l’onn 2006 è da colliar famiglias en il lieu da Tavau e d’organisar occurrenzas e curs per uffants, giuvenils, famiglias e creschids. La giuria ha distinguì l’Uniun FamilienRat per lur lavur voluntara a favur da las famiglias da Tavau.
Il schef dal Departament chantunal d’educaziun, cultura e protecziun da l’ambient, Jon Domenic Parolini ha purtà ils salids ed ils auguris da la regenza als victurs dals premis. «Lavur voluntara è lavur gratuita, ma questa lavur è nunditg custaivla», ha Parolini ditg a l’adressa da la fundaziun Benevol Grischun. «L’engaschi voluntari en il servetsch da la cuminanza ha ina lunga tradiziun. Quai vala specialmain per il Grischun, nua ch’il stadi aveva en ses cumenzament fitg pacas forzas da lavur ed era organisà en moda e maniera fitg decentrala.» En la cuminanza pitschna d’in vitg saja adina stà uschia che mintga abitanta ed abitant contribuiva al bainstar cun lavur voluntara. Tar ils pumpiers s’haja quel principi sa mantegnì fin oz. Jon Domenic Parolini ha engrazià a tuttas voluntaras ed a tuts voluntaris. «Jau sun superbi d’esser il schef da quest departament chantunal cun tantas voluntaras e voluntaris en las spartas cultura e sport.»
Render visibla la lavur voluntaria
L’organisaziun svizra per lavur voluntaria Benevol ha oz 17 secziuns regiunalas. Ina da las finamiras da Benevol è da render visibla la lavur voluntaria. En l’entira Svizra vegni prestà oz 666 milliuns uras lavur voluntaria en ils pli differents secturs. Circa in terz da las abitantas ed abitants da la Svizra s’engascha voluntariamain. Tar quella lavur «benevola» appartegna l’engaschament en societads caritativas, socialas ed ecclesiasticas sco era en organisaziuns da sport, cultura e cuminanzas d’interess. Engaschaments voluntaris datti er sin il sectur da la protecziun da l’ambient, dals dretgs umans sco era en cumissiuns e gremis politics. Varga 2000 uniuns ed organisaziuns èn colliadas cun Benevol Svizra. (fmr/mg)
Grischun
Premi Benevol 2021 va en il Puschlav
Il settavel Premi Benevol dal Grischun è vegnì surdà sonda vargada a Cuira a la Fondazione Ente Museo Poschiavino. Il museum regiunal dal Puschlav che s’engascha dapi l’onn 1950 per conservar l’istorgia dal Puschlav è vegni fundà a sias uras da la Pro Grigioni Italiano. Il premi per l’engaschi voluntari da las 50 gidantras e gidanters e vegnì surdà da cusseglier guvernativ Jon Domenic Parolini ch’ha accentuà sonda en ses pled festiv la grond’impurtanza da la lavur voluntaria e l’agid al vischin. Sper il premi principal ha la fundaziun Benevol Grischun surdà dus premis da renconuschientscha a l’uniun FamilienRat da Tavau ed a l’uniun Informatica per l’Africa.
Gust da leger dapli?