Barvogn/Filisour: survigilaziun da video tigls locals da rimnar rusment
Igl cumegn da Barvogn Filisour dumonda chels deis la populaziun pigl dretg, per pudeir installar survigilaziuns da video aint igls locals da rimnar rusment. Uscheia fissigl pussebel d’identifitgier persungas e nomras d’autos an cass da rusment dismess fallo u acts da vandalissem.
«Nous vagn problems cun dismessas illegalas tigls noss locals per rimnar rusment», declera Luzi C. Schutz, mastral digl cumegn da Barvogn Filisour. Igl cumegn ò perchegl relaschea aint igl figl uffizial en decret general per installar ena survigilanza da video tigls locals per rimnar rusment. Da survigilar cun video en tal li public po esser delicat, gist an connex cun la protecziun da datas. È chegl ansomma legal? E tge capeta cun las registraziuns?
Dumandar pigl dretg
A Barvogn Filisour nissan filmadas persungas ed igls nomers da lour autos – tot ansasez datas sensiblas. Igl cumegn elaborescha actualmaintg en nov concept da dismessa, per exaimpel vignan installos mologs a Barvogn ed a Filisour biegia igl cumegn igl grond local «Frevgias» per rimnar rusment. «Nous dumandagn ossa pigl dretg, per tgi pudessans forsa installar las survigilaziuns. Schi chegl saro alloura igl cass tar tot las dismessas, n’è betg anc cler. La survigilaziun duess an mintga cass procurar per en effect starmentont», accentuescha Luzi C. Schutz.
Dismessas illegalas
Igl davos taimp ò igl cumegn da Barvogn Filisour observo varsaquantas dismessas illegalas, i sa tracta primarmaintg da satgs nunuffizials tgi vignan dismess tuttegna aint igls locals. Igl mastral concretisescha las observaziuns: «Anturn igl local provisoric ‹Frevgias› a Filisour vainsa per exaimpel ena seiv. Regularmaintg, i sa tracta prubabel d’ena singula persunga, schea lò en singul satg da rusment nunuffizial tgi vign patto sur la seiv. Cun ena survigilaziun savessans eleminar da chels cass», dei Luzi C. Schutz.
Angal en problem a Filisour?
A madem taimp ò igl cumegn da Zernez ainten la Nagiadegna relaschea en decret general per pudeir installar ena survigilanza da video tar en local da rimnar rusment ainten la fracziun da Susch. «Separar chel rusment betg lubia è pigls noss luvrants communals ena gronda lavour ed ans caschunga er costs», ò declero igl mastral da Zernez Emil Müller, anvers la FMR. Er ainten otras fracziuns digl cumegn ins vegia gia aint igl passo da chels problems tg’ins vegia pero savia schliier cun survigilar cun video, dei Emil Müller venavant.
Populaziun ò igl dretg da far recurs
Igl decret general aint igl figl uffizial ò igl cumegn da Barvogn Filisour relaschea avant treis emdas. Chel decret è part dalla procedura legala ed ansomma premissa per tgi ena instituziun – an chel cass igl cumegn – possa survigilar igl spazi public cun video. Tge tgi vala scu spazi public è reglo ainten la Lescha cantunala davart la protecziun da datas. Chella lescha definescha er tge tgi vegia da capitar cun las datas registradas. Aint igl cass da Barvogn Filisour vignan las registraziuns stidadas automaticamaintg siva da set deis, sch’ellas na vignan betg utilisadas per proceduras penalas. Digl rest èn ellas accessiblas angal per commembers dalla suprastanza e digl Uffezi da biagier ed er angal alloura, sch’igl è nia constatto ena dismessa illegala ni en act da vandalissem.
La populaziun ò taimp 30 deis a parteir dalla publicaziun per inoltrar recurs cunter igl decret, vot deir anfignen igls 18 da december 2021.
BOX: Valetar pi ot la protecziun dallas datas?
«Ia na sung ansomma nign amei dalla survigilaziun da video.» – chegl dei Thomas Casanova, igl incumbenso per la protecziun dallas datas digl cantun Grischun. El è l’instanza da controlla independenta tgi survigilescha tgi la protecziun dallas datas vigna realisada e risguardada. El è er post da consultaziun e d’infurmaziun per persungas privatas e l’administraziun.Tenor Thomas Casanova ègl exagero da survigilar cun video en local per rimnar rusment. El declera pertge: «Ensatgi tgi depona ensatge tg’el na dastgess betg e vign tschiff, survign angal ena multa disciplinara. Las datas tgi vignan registradas, damai igls purtrets dallas persungas ed igls nomers digls autos, èn pero fitg delicats. Per me n’è betg dada la relaziun tranter castiier cun ena multa e proteger datas persunalas cunter maladiever.
La protecziun dallas datas stuess neir valetada pi ot e perchegl fissigl da desister alla survigilanza cun video.»Scu incumbenso per la protecziun dallas datas pò Thomas Casanova pero angal cunsiglier. Decisiv è pero chegl tgi stat ainten la lescha: «Tenor la Lescha cantunala davart la protecziun da datas dastga en cumegn montar cameras da video – er per survigilar en local per rimnar rusment», dei Thomas Casanova e precisescha: «Aint igl artetgel 3a, nomer 1, stat numnadamaintg tg’igl spazi public e chel spazi tgi è accessibel agl public possan neir survigilos cun apparats per transmetter e registrar purtrets per identifitgier persungas. Chegl, schi la siertad publica ed igl urden public seian pericilitos e schi chegl seia necessari per proteger edifizis tgi servan ad en scopo public ni alloura per proteger utilisadras ed utilisaders.» (fmr/an)
Gust da leger dapli?